“МТЗ”-ийн захирал М.Энхсайхан өнгөрөгч долоо хоногт үүрэгт ажлаасаа чөлөөлөгдсөн. Түүнийг  өмнөд хөрш рүү татах төмөр царигийн асуудлаар салбарын сайдтайгаа санал зөрөлдсөний улмаас ажлаасаа  халагдсан гэх мэдээлэл сонин хэвлэлээр цацагдаад байгаа. Чухам ямар үндэслэлээр ажлаасаа халагдсан талаараа тэрбээр дараахь тайлбарыг өглөө.

-Та ямар үндэслэлээр ажлаасаа халагдав. Албан ёсоор ажлаа хүлээлгэн өгсөн үү?

-“МТЗ”-ийн захирлын албыг өнөөдөр хүлээлгэн өглөө. Ямар үндэслэлээр үүрэгт ажлаасаа чөлөөлөгдсөн тухай тодорхой мэдээллийг ирэх пүрэв гарагт хэвлэлийн хурлаар мэдээлнэ.  Товчхондоо, намайг төмөр замын тээврийн талаар баримтлах бодлогыг хэрэгжүүлэх талаар шинэчлэлийн Засгийн газраас тавьсан зорилт, Зам тээврийн яамнаас барьж буй бодлоготой зөрчилдсөн гэсэн үндэслэлээр ажлаас  чөлөөлсөн байх. Бондын мөнгийг төсвийн мөнгө үрэн таран хийдэг шиг зарцуулж болохгүй гэсэн байр суурьтай байгаа би. Үр ашигтай зарцуулахад юун түрүүнд бид бусад улсаас  өөрсдийгөө тусгаарласан мунхаг бодлоготой байж болохгүй. Ийм бодлогоор  монголчууд өртэй болох юм бол хүний улс болно.  Монголчууд  эдийн засгийн ашиг гаргаж чадахгүй бол ядуу  байна.  Ядуу  хүний сэтгэлгээ ямар байдаг билээ. Бидний амссан зовлон. Ийм зүйлийг хийлгэхгүй би.  Энэ талаар ярина. Идэвхтэй ярина гэж бодож байна.

-Ажлаас чөлөөлөгдсөн талаараа Шадар сайд Д.Тэрбишдагватай санал солилцсон уу?

-Үгүй, Бүгд мэдэж байгаа шүү дээ. Би хувийн  асуудлаар эвсэлд  гомдол гаргаад байгаа юм  байхгүй. Бондоороо зөв зүйл хийе. Битгий салхинд хийсгээсэй гэсэн бодолтой байсан.

Урд хойд хөршөө үгүйсгээд орос хятадтай муудалцахаар хаа хүрэх вэ. Байж болохгүй асуудал. Нарийндаа яривал монголчуудын өмнө явж ирсэн алдаанууд юу вэ гэхээр хөршүүдтэйгээ муудалцаж ирсэн. Энэ алдаатай бодлого шүү дээ. Улс төрийн том алдаа. Үүнийгээ засах хэрэгтэй.

Төслүүд хэдийгээр бондоос мөнгө босгож байгаа ч гэсэн  30 хувиас хэтрүүлэхгүй гээд хуульд тусгасан.  Цаана нь 70 хувийг өөрсдөө хөрөнгө оруулагчдыг татаж босгох хэрэгтэй.  Хийж байгаа  төсөл нь ийм ашигтай шүү гэж хэлэх ёстой шүү дээ.  Гэтэл хэлэх ёстой төсөл нь хуруу дарам цөөн байна. Төмөр зам дотроос ердөө Гашуун сухайт-Таван толгой   чиглэлийн төсөл өөрөө мөнгө босгох чадвартай.  Мөнгө шингээх  чадвартай төсөл. Бусад нь бүгд одоохондоо судалгаа тооцоогоо нарийвчилж гаргаагүй.  Иймээс буруу бодлого явуулж байгаа учраас их мөнгийг элсэнд шингээж байна.  Маш буруу. Хавь ойртойгоо уяалдсан бодлого алга. Эхлээд төмөр зам барихаасаа өмнө хөршүүдтэйгээ хэлэлцээрийн ширээнд сууж танай нутаг дээгүүр жоохон юм зөөх гэсэн юм. Боомтоор чинь  цааш нь гаргамаар байна гэдэг гэрээ хийж сурах ёстой. Ийм гэрээ хийх учиртай Зам тээврийн яам энэ ажлаа хийхгүй.  Мэргэжилтнүүдийни хэлж буйг сонсохгүй, өөрөө өөрийгөө тусгаарлаад байгаа. Энэ  байдал нь тэд өөрсдийгөө бус Монголыг бусад улс орноос тусгаарлана. Ингэж үл ойлгогдох  зүйл бий болгож болохгүй. Энэ бол дэндүү боловсролгүй хүмүүсийн  хийж байгаа ажил.

-Таныг Үйлдвэр хөдөө аж ахуйн сайд, зам тээврийн сайд хоёр ажлаас тань чөлөөллөө гэсэн мэдээлэл их гарч байгаа. Энэ хэр үндэслэлтэй юм бэ?

-Х.Баттулга сайдад нэг зүйлийг харуусаад байна. Ерөөсөө хүн сонсдоггүй. Өөрийгөө  зөв гэсэн бол  чигээрээ зүтгэдэг. Гэтэл  хүн бусдыг сонсч, өөрийгөө өөрчлөх чадвартай байх хэрэгтэй шүү дээ. Би ч буруу ярьж болно.  Би асуудлыг ярихдаа олон хүнтэй зөвлөдөг. Ингэж үргэлж зөвлөлдөж байж хамтын оюун ухаан гарна. Өөрийгөө ухаантай гээд бодчихсон. Бусдыг сонсдоггүй муу чанар Х.Баттулга сайдад бий.  Тэр чанараа өөрчлөөсэй. Тэгэхгүй бол боловсролын төвшин зөрчихвөл мэдээлэл нь зөрнө.  Тэгвэл монголд л гай болно.

-Таныг Төрийн өмчийн хорооны даргын албыг хаших байх гэсэн мэдээлэл гарч эхэллээ?

- Худлаа. Хүмүүсийн цуу яриа байх.

-Та шинэчлэлийн Засгийн газарт дахиж алба хаших уу?

-Бараг л үгүй гэж бодож байна.

-Яагаад?

-Би түүнийг шийддэг хүн биш. Маш хариуцлагатай ажлаа надад өгсөн. Ажил хийх гэхээр хийлгэхгүй байгаа юм чинь өөр надад  ямар ч ажил өгөөд нэмэргүй. Би очоод дахиад л энэ чинь буруу байна гэж хэлнэ. Дахиад намайг өшиглөнө.Тийм учраас хувь хүнийнхээ хувьд тийм хувь заяаг амсмааргүй байна.

-Таньд Засгийн газар байгуулагдах үед сайдын суудал амалсан. Та татгалзсан гэсэн. Яагаад татгалзах болов оо?

-Өнгөрсөн  юмыг яримааргүй  байна. Анх Засгийн газар байгуулагдах  үеийн л асуудал. Сонгуулийн дараа  Засгийн  газар байгуулагдах нь өөрөө амин асуудал. Гэтэл нэг хоёр хүнээс болоод байгуулж чадахгүй бол Монгол Улсад  хүнд байдал үүснэ. Тийм учраас Засгийн газрыг байгуулах ажлыг түргэвчлүүлэх үүднээс  би голд нь зогсоод яахав гэж бодож замаа тавьж өгсөн.

-“Шударга ёс” эвсэл задарна гэсэн мэдээлэл  байнга л  гардаг. Үүнд та ямар бодолтой байна вэ?

-Тийм ирээдүйг харахгүй байна.

-МАХН-ын дарга Н.Энхбаяр хувьд ямар байр суурьтай байна вэ?

-Монгол төрд зүтгэж байсан хүндээ  хандаасай гэж би үргэлж хүснэ. Хүн алддаг шүү дээ.

-Ерөнхийлөгчийн сонгуульд өрсөлдөх үү?

-Одоохондоо мэдэхгүй.

Н.Бүжин