УИХ-ын гишүүн Д.Батбаяр 20 жилийн дараа Хан-Уул дүүргийн цагдаагийн хэлтэст зочлолоо. Д.Батбаяр 1991 онд  Хан-Уул дүүргийн цагдаагийн хэлтэст ажиллаж байжээ. Тэрбээр энэ талаар дурсан ярихдаа “Би анх 19 настай байхдаа энд хөдөлмөрийн гараагаа эхлэж байсан юм. Бас ч үгүй үйлдэл дээр нь ганц хоёр гэмт хэрэг илрүүлж байла” гэв. 1991 онд намайг ажилаж байхад одоогийн ЦЕГ-ын дарга  Д.Сандаг-Очир манай даргаар ажиллаж байлаа.  Тухайн үед  дарга намайг барилддаг, бас хурдан гүйдэг, арай бядтайгаараа чи яв гээд л яаралтай хүнд хэрэгтээ явуулдаг байсан юм. Анх сумод зургаан монгол залуу 1992 онд очиж байхад бэлтгэл сургууль тэсвэрлэшгүй хүнд санагдаж цөхрөх үе гарч байсан ч яг энд цагдаа хэмээх эрхэм ажлыг хийж гүйцэтгэж байсан болохоор хатуужилтай  байсан санаддаг юм. Анх очсон зургаан залуугаас гурав нь барилдаж үлдсэн юм. Энд та нартайгаа одоо уулзахад сайхан байна” хэмээлээ. Гишүүнийг ажиллаж байх үед ХУ дүүргийн цагдаагийн хэлтэс “Ажилчны районы цагдан сэргийлэх хэлтэс” гэдэг нэртэй байсан аж. Тэрбээр “Урьд намайг ажилаж байхад эрүүлжүүлэх байсан байрыг засаад одоо хүчний бэлтгэлийн заал болгож байгаа юм байна,  би хувиасаа энэ заалыг бүрэн тохижуулж өгье” гэж амлалаа.