Дархан-Уул аймгийн "Дархан өртөө"-нд 24 цагийн турш гурван ээлжээр ажилладаг "Ок" гэх зоогийн газар бэлтгэж болгосон махыг 10 гаруй хоног хадгалаад иргэдэд халааж өгч үйлчилдэг байсан нь шалгалтын явцад илэрчээ. Тус аймгийн мэргэжлийн хяналтын хэлтсээс хүнсний үйлдвэр худалдаа, нийтийн хоолны цэгүүдэд хийгдэж буй шалгалтын явцад уг үйлдлийг илрүүлсэн байна. Тус зоогийн газрынхан бүх төрлийн хоолонд хийдэг махаа урьдчилан болгож бэлтгээд хэд хоногоор ч хамаагүй зарагдаж дуустал нь хадгалдаг байсан аж. Мөн уг бэлтгэсэн хоол хүнсээ үйлчлүүлэгчдэд шууд халааж, тавагладаг байсан нь хөдөлшгүй баримтаар тогтоогдсон байна. Нэг удаагийн шалгалтаар л гэхэд тус газраас 25.3 кг болгосон, үнэр орсон мах илрүүлж устгалд оруулсон бөгөөд үзүүлэн болгосон зууш, шинжилгээний бичиггүй өндөг худалдаалж, эрүүл мэндийн наад захын шаардлага хангахгүй орчинд хоол бэлтгэж, ажилтнууд нь эрүүл мэндийн хуудас хуурамчаар үйлдсэн байжээ. Шалгалтынхан үнэр орсон махыг устгалд оруулахад багагүй эсэргүүцэл үзүүлсэн бөгөөд үйлчлүүлэгчийн ходоодыг хогийн савтай зүйрлэсэн тус зоогийн газрын үйл ажиллагааг түр хугацаагаар хаасан талаар http://www.darkhantimes.com сайтад сэтгүүлч Д.Гэрэлцэцэг мэдээлснээр хүргэв. П.Сайнаа