Шударга өрсөлдөөн хэрэглэгчийн төлөө газар нь үүрэн холбооны оператор компаниудтай нэг минутаас дотогш ярианы төлбөрийг секундээр тооцох ажлыг энэ оны гуравдугаар сарын 01-нээс, дараа төлбөрт хэрэглэгчээс авсан барьцаа төлбөрт хүү тооцох, сайн түүхтэй хэрэглэгчийн барьцаа төлбөрийг буцаан олгох асуудлыг 2012 оны арваннэгдүгээр сарын 01-нээс хэрэгжүүлэхээр тохиролцсон билээ. Одоогоор Юнител компанийн хувьд олон жил төлбөрөө хугацаанд нь төлсөн хэрэглэгчдийн, болон тэдгээрийн барьцааг үе шаттайгаар чөлөөлөх судалгаа хийгдэж байгаа бол Скайтел компани нь барьцаа төлбөргүй Nice үйлчилгээг нэвтрүүлэн барьцаа төлбөрийг хэрэглээний төлбөрт шилжүүлэх ажлыг хэрэгжүүлж эхэлжээ. Өөрөөр хэлбэл эхний ээлжинд 10 жил түүнээс дээш жил хэрэглэсэн хэрэглэгчдийн барьцаа хөрөнгийг шилжүүлэх ажил яг одоогоор хийгдэж байгаа юм байна. Харин Мобиком компани 10 ба түүнээс жил ашиглаж буй хэрэглэгчийн барьцаа төлбөрийг буцаан олгож байгаа юм байна. Одоогоор 7000 хэрэглэгч хүү тооцуулан аваад байна. Мөн ХХБ-тай хамтран гаргасан төлбөрийн картыг авч хэрэглээнээс хамаарсан урамшууллуудыг авахаас гадна барьцаа төлбөрөө тухайн картын дансанд байршуулан хүү тооцуулан авах боломжтой болж байгаа юм байна. Жи Мобайл найдвартай хэрэглэгчдийг шүүж барьцааг нь буцаан өгч эхэлсэн ба 9311 серийн дараа төлбөрт хэрэглэгчийн 79 хувь нь барьцаагүй болсон байна.Харин секундээр тооцох алхамын хувьд бүх үүрэн холбооны оператор компаниудын хувьд гуравдугаар сарын 01-ний өдрөөс нэвтрүүлэхээр бэлтгэл ажлаа хангаж ажиллаж байгаа юм байна.   Д.Цэцэг