АНУ-ын Нью-Йорк хотод өнгөрсөн оны тавдугаар сард Монгол орны хожуу цэрдийн үеийн “Тарбозавр батаар”-ын араг яс дуудлага худалдаагаар зарагдсан гэх мэдээлэл гарсан билээ. Уг мэдээллийн дагуу  манай болон олон улсын эрдэмтэдсудалж, уг үлэг гүрвэлийг монголынх хэмээн батласнаар худалдагдсан “Тарбозавр батаар”-ыг эх орондоо эргүүлэн авчирахаар болсон юм. Гэвч манай улсад үлэг гүрвэлийн эртний олдворт зориулсан тусгай музей байдаггүй, Байгалийн түүхийн музейд түрээсээр үлэг гүрвэлийн араг ясыг байрлуулдаг гэдгийг албаныхан мэдээлсэн тул палентлогийн олдворт зориулсан тусгай музейтэй болох шийдвэрийг Засгийн газраас гаргасан юм. Уг шийдвэрийг Засгийн газрын 2013 оны нэгдүгээр сарын 12-ны өдрийн 11 дүгээр тогтоолоор баталсан бөгөөд Соёлын өвийг хадгалж хамгаалах, бүртгэж баримжуулах,  хойч үедээ өвлөн уламжлуулах, палеонтологийн олдворыг нийтэд сурталчлах зорилгоор “Үлэг гүрвэлийн төв музей” байгуулахаар тогтсон. Уг тогтоолоор соёлын үнэт өв болох аварга үлэг гүрвэлийн олдворуудыг манай улсад музейн зориулалтаар баригдсан объект болох В.И.Лениний музейд байршуулах, уг барилгыг Үлэг гүрвэлийн төв музейн балансад шилжүүлэхээр шийдвэрлэсэн юм. Энэ хүрээнд ССАЖЯ-ны Төрийн нарийн бичгийн дарга П.Алтангэрэл, Соёлын өвийн хэлтсийн дарга Ц.Цэндсүрэн, Үлэг гүрвэлийн төв музейн захирал Н.Жавзмаа, Төрийн өмчийн хорооны хуулийн хэлтсийн ахлах мэргэжилтэн Ч.Ганбат, бүртгэлийн мэргэжилтэн Н.Батбаатар   зэрэг холбогдох албаны хүмүүс МАН-аас  хүлээж авах талаараа албан бичиг илгээгээд байсан юм. Тиймээс ССАЖЯ болон Төрийн өмчийн хорооноос ажлын хэсэг байгуулагдан Музейн барилга, урьдчилсан байдлаар тооцоолон гаргаад байгаа  4963 үзмэр, үзүүллэгийг өнөөдөр тус музейд хүлээж авах байсан юм. Хүлээн авах комиссынхон товлосон цагтаа буюу 11.00 цагт очиход МАН-аас байр хүлээлгэж өгөх төлөөлөл бүхий албаны хүн байхгүй, Музейн хаалга үүд нь цоожтой байлаа. Тиймээс ажлын хэсгийн ахлагч П.Алтангэрэл дарга МАН-ын дарга Ө.Энхтүвшинтэй утсаар холбогдон “Гурав хоногийн өмнө өгсөн албан бичгийн дагуу бид цагтаа ирээд байна. Танайхаас хүн ирж байна уу” хэмээн тодрууллаа. Харин уг асуултад Ө.Энхтүвшин дарга “Бид энэ асуудлаар хоорондоо ярилцаж байна. Удахгүй хариу өгье, өнөөдөр очих боломжгүй” гэсэн хариултыг өглөө. ССАЖЯ-ны удирдлагууд МАН-аас ирэх хариуг хүлээх бөгөөд цаашид уг барилгад засвар шинэчлэлийн ажлыг хийхээр төлөвлөөд байгаа ч ийнхүү МАН-аас байр хүлээлгэж өгөх хүн ирээгүй учир тодорхойгүй хугацаагаар хойшилж байна. П.Наран