“МИАТ” компанийн хуучин захирал Ц.Орхон нарын есөн хүн мөнгө угаасан хэргээр УМБГ-ын Эдийн засгийн гэмт хэрэгтэй тэмцэх хэлтэст шалгагдаж буй. Тэгвэл  тэдний араас тус компанийн   шинэ удирдлага болох Г.Жаргалсайхан ч шалгуулж эхэлжээ.

“МИАТ” компанийн Бодлого төлөвлөлтийн хэлтсийн дарга С.Билэгсайханы  өгч буй мэдээллээр Г.Жаргалсайхан захирал нь өөрийн эхнэр болон төрсөн дүү нараа “МИАТ” компанид   ажлуулдаг.

 Түүнчлэн Баянхонгор аймгийн “Нүхт-тур” ХХК- руу жил бүр 200 сая төгрөг шилжүүлдэг байсан гээд маш олон хууль зөрчсөн үйлдлүүд бий гэнэ. С.Билэгсайхан дарга хэлэхдээ “Би "МИАТ" компанид ажилд ороод удаагүй. Маш их зөрчил бий. Б.Жаргалсайхан захирал өмнөх удирдлага болох  Ц.Орхонтой  адилхан нууц тушаалуудыг гаргаж байна. Нууц тушаалын цаана маш их  хуйвалдаан бий.

 Үүнийг захиралдаа  би хэлсэн. Манай компани  вино худалдан авахад жилд  500 сая төгрөг зарцуулдаг. Өнгөрсөн жилд ширхэг бүрийг нь  5.6 еврогоор авдаг байсан. Гэтэл энэ жил 4.7 еврогоор худалдан авах санал орж ирсэн атал  7 еврогоор вино худалдан авах гэрээ байгуулсан  үэрэг маш олон булхай луйвар хийж байна.

Энэ бүхнийг ард түмэнд ил болгох үүднээс би та бүхэнд мэдээлэл өглөө. Иймээс манай МИАТ-ыг  өнөөдрийн байдлаар Цагдаагийн байгууллага, Төрийн өмчийн хороо зэрэг таван газраас  шалгаж байна. Шалгалтын дүн ирэх долоо хоногт гарахаар дэлгэрэнгүй мэдээллийг өгнө” гэв. Уг асуудалтай холбогдуулан Зам тээврийн сайдын зөвлөлийн хуралдаан болж, “МИАТ” ХК-ийн  захирал Г.Жаргалсайхан тэргүүтэй албан тушаалтнуудын эрх мэдлээ хэтрүүлсэн  гэмт хэргийн шинжтэй үйлдлийг илрүүлж холбогдох хуулийн байгууллагад шалгуулахаар болсон байна.

Н.Бүжин