Хуучин ЗСБНХУ-ын ерөнхийлөгч асан Михаил Горбачев  оросын одоогийн удирдлагыг дахин зад шүүмжлэв. Тэр бямба гарагт РИА “Новости” агентлагт түүхэнд хүний гүйцэтгэдэг үүргийн тухай лекц уншихдаа, эрх баригчид эсэргүүцлийн давалгааг намжааж чадсан ч, хэсэг хугацааны дараа  дахин давалгаална гэж мэдэгджээ. “Эрх баригчид эсэргүүцлийн давалгааг ямар нэг хугацаагаар намжааж чадах ч,  асуудал өөрөө хаашаа ч алга болохгүй.  Хэрвээ бүх зүйл бахь байдгаараа байвал, асуудал хурцдана. Энэ нь оросын нийгэм бодит ардчилалд шилжихийг дахин оролдоно гэсэн үг бөгөөд  энэ оролдлого  түүхэн учир холбогдолтой байх болно” гэж Горбачев хэлсэн байна. Өнөөдөр улс төрийн бодлого дууриамал зүйл болон хувирч, эдийн засаг нефть, шатдаг хийн тариагаар аргацааж, харин бага бизнес асар их саад бэрхшээлтэй тулгарч байна гэж тэр хэлжээ. Нийгмийн хүрээ, түүний дотор боловсрол, шинжлэх ухаан, эрүүл мэндийн салбарын байдалд Горбачев сэтгэл түгшиж байна. “Владимир Путиний ерөнхийлөгчийн хоёр дахь хугацаа  шинэ стратеги хэрэгжүүлэх боломжийг нээсэн ч, эрх баригчид огт өөр замаар явлаа. Медведевийг ерөнхийлөгч байсан жилүүдэд ч бүх зүйл хуучнаараа үлдсэн юм” гэж хуучин зөвлөлтийн удирдагч мэдэгдээд, байдал тогтворжсоны  дараа зогсонги байдалд биш, харин шинэтгэлд шилжих хэрэгтэй байсан юм гэж тэмдэглэжээ. С.Золбоо