Монголын өнөөгийн нийгэмд хөгшин залуу, баян ядуу гэж ялгахгүй нүүрлээд байгаа нэгэн зовлон бол хорт хавдар. Уг нь дэлхий нийтэд энэ өвчнийг ахмад насныханд зонхилон тохиолддог өвчин гэж үздэг ч манай орны хувьд энэхүү өвчин нь хэнд ч тохиолдож болзошгүй аюул болсон гэвэл буруудахгүй бизээ. Тэгвэл монголын Хип хоп гэгч урсгалын анхдагчдийн нэг “ICETOP” хамтлагийн дуучин Б.Хатанбаатар буюу Хаагий хорт хавдар  гэгч өвчнөөр өвдөж, амь насанд нь аюул нүүрлээд байгаа аж. Тиймээс өнөөдөр Хаагийгийн ээж, хамтлагийн гишүүн Манлай, сэтгүүлч Ш.Гүрбазар, “Харанга” хамтлагийн дуучин Ц.Чулуунбат нар Зууны мэдээ сонины Үндэсний мэдээллийн төвд хэвлэлийн бага хурал хийлээ. Энэхүү хурал "Хүн хүнээ хайрлах өр нинжин сэтгэл манай ард түмэнд бий" гэсэн ерөөлөөр үгээр эхэлсэн юм. Монголын рок попын ертөнцөд нэгэн шинэ хуудсыг нээсэн, хип хопын ууган хамтлагийн нэг

бол “Ice Top” хамтлагийн гишүүн Б.Хатанбаатар аюулт өвчин тусч, одоо эрчимт эмчилгээ хийлгэж байгаа аж. Артерийн судас дагасан нойр булчирхайн хорт хавдар гэсэн албан ёсны онош гарсан гэнэ. Энэхүү өвчнийг манайд эмчилвэл 10-20 хувийн эдгэрэх найдвартай гэсэн байна. Харин эрүүл мэндийн технологи өндөр хөгжсөн Японд эдгэрэх найдвар 90 хувьтай ч үнийн хувьд харьцангуй өндөр юм байна. Иймд миний Монголын ард түмэн ухаантай, өвдөж зовсон нэгэндээ халуун сэтгэлээр туслах, харамгүй сэтгэл хангалттай байгаа гэж хуралд оролцсон урлагийн гавьяат зүтгэлтэн, зохиолч сэтгүүлч Ш.Гүрбазар онцолсон.

Мөн УГЗ, “Харанга” хамтлагийн дуучин Ц.Чулуунбат “Монголын урлагийн төлөө цохилох зүрхтэй, энэ хүүг хөл дээр нь босгох чин сэтгэл бидэнд байна” гэв. Харин тус хамтлагийн гишүүн Манлай энэ үеэр “Миний энэ биений минь нэгэн хэсэг болсон анд найзын маань амь насыг аврахад монголын ард түмэн минь чин сэтгэлээсээ тусалж, хандивийн тоглолтуудыг маань үзэж сонирхон сэтгэлийн дэм хайрлана гэдэгт итгэж байна. Миний анд Хаагийд туслахыг чин сэтгэлээсээ хүсч байна. Үнэхээр хүнд байгаа. Илүү и хийг ярих гэхээр сэтгэл хямраад хэцүү байна. Монголчууд минь “Зовох цагт нөхрийн чанар танигдана” гэдэг дээ. Тийм болохоор монголын нэг сайхан хүүг аврахад туслана гэдэгт итгэж байна” гэлээ. Мөн энэ үеэр Монголын урлагийн одод нэгдэж, эмчилгээний зардалд нь бага ч болтугай хандив үзүүлэх харамгүй сэтгэлээр “Халуун сэтгэл” хандивын тоглолтыг зохион байгуулах гэж байгааг танилцууллаа.

Таны авсан нэг тасалбар түүнд амьдрал бэлэглэх сэтгэлийн хандив болох юм. Тоглолт “UB palace” концертийн их танхимд энэ сарын 6- 9-нд буюу дөрвөн өдөр үргэлжилнэ. Тодруулбал, “Халуун сэтгэл” тоглолт дөрөвдүгээр сарын 6-нд Рок попын одод, 7-нд Нийтийн дууны одод, 8-нд Хошин урлагийн одод, 9-нд Хип хоп одод тоглолтоо тавьж хандивийн тоглолтонд нэгдсэн байна. Тасалбарын үнэ 10000 төгрөгөөр худалдаалагдаж байна. Мөн Голомт банк-1805030800, Хаан банк- 5034146252, Хадгаламж банк-10290019662 дансаар чин сэтгэлийн хандив өргөж болно. Холбоо барих утасны дугаар 97119090,86009090. Түүнчлэн 151015 дугаар руу Хаагийд сэтгэлийн үгээ илгээх боломжтой юм байна.

П.Наран Гэрэл зургийг Б.Мөнх-Эрдэнэ