Б.Энхбайгалийг Үндэсний хөгжлийн хүрээлэнгийн захирлаар томиллоо
Монгол Улсын Ерөнхийлөгчийн Тамгын газар, ШУА-ийн харьяа Үндэсний хөгжлийн хүрээлэнгийн захирлаар Б.Энхбайгалийг томиллоо. Үндэсний хөгжлийн хүрээлэн нь эдийн засаг, нийгмийн хөгжлийн судалгааг онол, арга зүйн өндөр төвшинд гүйцэтгэж, төр, захиргааны төв байгууллагыг шинжлэх ухааны үндэслэлтэй бодлогын зөвлөмжөөр хангах зорилго бүхий эрдэм шинжилгээний байгууллага юм.
Тус байгууллагын захирлаар томилогдсон Б.Энхбайгаль нь удирдахуйн ухаан, төрийн удирдлага, эдийн засаг, бодлого судлал, системийн онол, шугаман бус динамикийн чиглэлүүдээр өндөр хэмжээнд мэргэшсэн эрдэмтэн юм. Доктор, дэд профессор Б.Энхбайгаль боловсролын салбарт 15 жил, төрийн албанд 13 жил, үүнээс найман жил захиргааны албан тушаалд ажиллажээ.
Тэрээр Нээлттэй нийгэм хүрээлэнд бодлогын шинжээч, Удирдахуйн ухаан, бодлого судлалын хүрээлэнд ахлах судлаач, магистрын зэрэг хамгаалуулах зөвлөлийн дарга, гишүүн, Удирдахуйн ухааны тэнхмийн эрхлэгч, Эрдмийн зөвлөл, захиргааны зөвлөлийн гишүүн, Удирдахуйн ухаан, төрийн удирдлагын чиглэлээр докторын зэрэг хамгаалуулах докторантурын хорооны нарийн бичгийн дарга, Удирдлагын академийн эрдэмтэн нарийн бичгийн дарга, Удирдахуйн ухааны хүрээлэнгийн захирал зэрэг ажил эрхэлж байсан хүн юм.
Д.Цэцэг
СЭТГЭГДЭЛ БИЧИХ