Үнийн хөөрөгдөл, хуулийн зөрчил гэх мэт шударга бус байдал газар авч байгааг эсэргүүцэн МАН-ын гишүүд, дэмжигчид өнөөдөр Сүхбаатарын талбайд жагсав. 300 гаруй хүн оролцсон энэхүү цуглаан, жагсаалыг МАН-ын дарга Ө.Энхтүвшин, УИХ-ын гишүүн  Д.Оюунхорол, Н.Номтойбаяр, Д.Лүндээжанцан, Ж.Энхбаяр, Б.Бат-эрдэнэ, О.Содбилэг нарын УИХ-ын гишүүд толгойлон зохион байгуууллаа. Тэд энэхүү жагсаалаа “Эрх баригчдад амлалтыг нь сануулж, Шудрага ёсыг шаардах цуглаан” хэмээн нэрлэжээ. Хэд хоногийн өмнөөс тус намын гишүүд дэмжигчид хөдөө орон нутгаас ирж, өнөөдрийн жагсаалд ирж байгаа талаар мэдээлэгдэж байсан энэхүү жагсаалд МАН-ын гишүүдээс гадна дэмжигчид гэх хөгшчүүд голдуу цугласан байлаа. Харин туг дарцаг, уриа лоозонг нь гишүүд дэмжигчид гэх залуучууд  барин зогсож харагдсан. Энэ үеэр МАН-ын дарга Ө.Энхтүвшин “Шинэчлэлийн Засгийн газар ард түмний амьдралыг доройтуулж байна. Би саяхан ард түмний амьдрал ямар байгааг өөрийн биеэр зах дээр очиж үзлээ. Хүнсний зах дээр махны үнэ тэнгэрт хадаж байна. Арга ядсан зарим нь хамгийн хямд үнэтэй гэгдэх малын гэдэс дотор худалдан авч байна. Атгахан гялгар уутан дотор элэг, бөөр, зүрх, сэмж, уушиг зэргээс жаахан жаахнаар нь нийлүүлсэн мах худалдан авч байна. Үүнийгээ набор гэж нэрлэдэг юм байна. Наранцэцэгийн тосыг саваар нь биш граммаар нь авахыг харлаа. Үнэхээр ард түмний амьдрал хүнд байна. Гэтэл нөөцийн мах худалдаална хэмээн тэрбумаар мөнгө зарцуулж байгаа ч энэ нь ямар ч үр дүнгүй нь харагдана. Өнөөдөр хүнсний зах дээр нэг кг үхрийн мах 1200 төгрөг байна” гэв. Түүний үхрийн махны үнийг 1200 төгрөг хэмээн “хэл хальтирахад” гишүүд дэмжигчид нь 12 мянга хэмээн засч “залруулав”. Харин УИХ-ын гишүүн Д.Лүндээжанцан “Монгол Улсын улс төрийн ууган хүчин, 220 мянган гишүүдтэй манай намыг доош нь хийх үзэгдэл хэрээс хэтэрч байна. Манай нам өнгөрсөн зуунд улс эх орынхоо тусгаар тогтнолыг бататгаж чадсан. Бидний өвөө, эмээ намын үзэл бодлыг  дэмжиж, бүтээн байгуулж ирсэн. Би цэл залуухан 22 настай байхдаа Сүхбаатарын талбайн баруун талын байшин дээр “Нам бол эрин үеийн нэр төр, нандин чанар мөн” гэсэн бичгийг харж, намынхааа батлахыг өвөрлөн алхаж явсан. Үнэхээр одоо л энэ үгний утга учрыг зах зухаас нь ойлгож мэдэж байна” гэлээ. Цуглааны индэр дээр тус намын эрхэм гишүүд ээлжлэн гарч, Ардчилал биш анархизм цэцэглэж байна, төрийн албыг төрлийн алба болгож байна, Чингис бондын өр 35 тэрбумд хүрчихлээ. Гэтэл ард түмний амьдрал дээшлэхгүй байна гэх зэргээр үгээ хэлсэн юм. Мөн угшил нэгтэй МАХН-ын нэгдэж, намын тугаа барьсан жагсагчид харагдаж байсан бол УИХ-ын гишүүн З.Баянсэлэнгэ тайзан дээр гэрч үг хэлсэн. Тэрбээр “Би жилийн өмнө та бүхэн шиг ингэж, хүйтэнд хөрч, халуунд халж, шудрага ёсны төлөө тэмцэж явсан. Одоо ч гэсэн шудрага ёсны төлөө та бүхэнтэй нэгдэж өөрийн үзэл бодлоо илэрхийлж байна. Ардчилал, шудрага ёсыг тогтоохын төлөө тууштай тэмцэнэ гэдгээ мэдэгдэж байна” гэв Жилийн жилд хаврын “синдром” гэж нэрлэгдэх болсон жагсаал цуглааныг МАН-ынхан энэ удаад олны анхаарлыг татахуйц содон болгож чаджээ. Учир нь тэд жагсаал цуглаан оролцож, дэмжиж буй дэмжигчиддээ хөгшин, залуу гэлтгүй шүгэл тараан өгсөн аж. Харин тэд тайзан дээр үг хэлж буй намын нөхдөө дэмжин шүглийн дуугаар дэмжиж байгаа илэрхийлж байлаа. Шүглийн дуутай цуглааны төгсгөлд МАН-ын зүгээс төрийн гурван өндөрлөгт шаардлага хүргүүлэхээр болсоноо мэдэгдсэн. Уг шаардлагад Засгийн газарт хариуцлага тооцох, хөдөлмөрийн хөлсний доод хэмжээг 280 мянгад хүргэх зэрэг 10 гаруй зүйлийг багтаасан  гэнэ. Уг шаардлагаа Төрийн гурван өндөрлөгт өгнө хэмээн МАН-ын гишүүд толгойлон, гишүүд дэмжигчдээ дагуулан төрийн ордны баруун талын хаалга руу жагсагчдийн цуваа хөдөлсөн юм. Улмаар Ё.Отгонбаяр, Ж.Энхбаяр, Я.Содбаатар, А.Тлейхан, Н.Номтойбаяр тэргүүтэй УИХ-ын гишүүд уг шаардлагаа төрийн гурван өндөрлөгт хүргэж өгөхөөр дотогш орсон. Харин УИХ-ын чуулганд тоотойхон сууж харагддаг гишүүн О.Содбилэг “Ард түмний төлөө ажиллах боломжоор хангадаггүй ардчилсан Засгийн газар огцрох ёстой, Шудрага ёс, эрх тэгш боломж, цалин тэтгэвэр, баян хоосны ялгааг арилгаж чаддаггүй Засгийн газар огцрох ёстой” хэмээн цагаан хоолойгоор чангаар хэлж, жагсагчдийг толгойлон Төрийн ордныг нэг удаа гороолсноор энэ удаагийн жагсаал өндөрлөлөө. МАН-ынханы эрх баригч АН-ын эсрэг хийж буй энэхүү жагсаалыг харж зогсоход өнгөрсөн 20 гаруй жилд ард түмний амьдрал доройтсоор байсныг харах нүд нь “сохорсон” байсан юм уу” гэдгийг асуумаар санагдсанаа нуух юун.

П.Наран Гэрэл зургийг Б.Мөнх-Эрдэнэ