Улсын Ерөнхий сайд алга болжээ. Сураг чимээ ч үгүй. Хаашаа яах гэж явсан нь сураг төдий. Бүхий л улсаараа дэн дун. Уг нь улсын тэргүүн жолоог атгадаг гурван эрхмийн маань нэг. Харж бай, хариуцаж бай гэж иргэн бид сар бүрийнхээ цалингаас чамлахааргүй мөнгийг татвар нэрээр өгдөгсөн. Гэтэл байдаггүй. Ерөнхий сайд нь алга болчихдог. Сураг төдийхнөөр Хэнтийн өндөр уулнаа Бурхан Халдун тийш зүглэсэн гэх. Найр наадам болоогүй л байлтай, ан ав тарчиг туранхайг мэдэлтэй буу шийдэм агсаагүй байлтай. Яах вэ жирийн мань бол ууланд төөрөөд жил сар болох бол энүүхэнд гэтэл Ерөнхий сайд шүү дээ. Хэн энэ албыг хашиж байгаа нь сонин биш гол нь төрийн гурван өндөрлөгийн нэг гэдэгтээ л асуудлын гол нь оршиж байгаа юм. Урьдчилж тооцоолоогүй энэ аялал баасан гарагийн өглөөнөөс эхэлжээ. 70 гаруй хүнтэй. Төлөвлөсөн ёсоор бүтэн сайнд ирэх ёстой байлаа. Ерөнхий сайд байдаггүй.  Цуг явсан дагуулуудынхаа хамтаар шүү.

Үүрийн 04 цагт түргэн авсан онцгойнхон нисдэг тэрэг хөлөглөн хайлаа. Олох нь ч олсон. Эрэх зөөх ажиллагаанд нь дор хаяж 85 сая төгрөг зарсан гэсэн шүү. Монгол улсын төрийг чиглүүлж байгаа гуравхан албан тушаал бий. Ерөнхийлөгч, УИХ-ын дарга, Ерөнхий сайд.. Намбарын Энхбаярыг Алтай Таван Богдод авирах үеэр бас л энэ тухай би ярьж байсан. Элдэв осол болбол яах вэ гэж. Улс эзэнгүйднэ биз дээ. Өнөөдөр Ерөнхий сайд муу амлаад яах вэ элдэв юм болбол улс маань яах вэ гэж. Азаар хээр нэг хонож,  хэдэн цаг цас малтаж, хацар нүүрээ жаварт хайруулаад л өнгөрч. Төрийн хүн төрлөө мартана гэдэг үг байдаг. Төр толгойлж байгаа бол өөрийгөө мартах ёстой. Алтанхуяг биш Монгол улсын Ерөнхий сайд гэдгээрээ.. Манай Онцгойгийнхон сайн ажилласан.

Найман сартай хүүхдийг эхтэй нь хамт хил давуулаад алдчихсан гашуун туршлага давтаагүйд жаахан баярлаж л байна. Ерөнхий сайд нь ямар ч холбоо харилцаагүй алга болно гэдэг тэдэнд том цохилт байж таарна. Ядаж албан тушаалаасаа мулт явна шүү дээ. Хүүхэдтэйгээ алга болсон тэр үед л гаргаж чадаагүй нисдэг тэрэг хоромхон зуурт л нисч очоод л Ерөнхий сайдыгаа аварч байна. Түүнтэй хамт явсан хорь гаруй хүн мөн азтай яа. Мөн ч бахархмаар. Иргэн бүрт үйлчилдэг ийм л албатай байхыг хүсч 20-иод жилийн өмнө хүнлэг ардчилсан нийгмийг сонголтоороо хийсэнсэн.

Миний бухимдаж байгаа шалтгаан нь нэгдүгээрт, улсыг толгойлж буй Ерөнхий сайд хүн яахаараа хувийн шалтгаанаар урьдчилсан төлөвлөгөөгүйгээр Хэнтийг зорьдог байна. Гэхдээ цас шуургатай зам муу байгааг Цаг уурынхан анхааруулсаар байтал тэгээд дээр нь байршлаа тодорхойлох холбооны хэрэгсэлгүй. Улсад байдаггүй юм аа гэхэд “Аялалын Цаг”-ийн Г.Бадамсамбуугаас зээлж болно ш дээ. Улс төрийн олон шалтгаан ярьж болох ч өнөөдөртөө тэр Ерөнхий сайд шүү дээ. Хоёрдугаарт, Ерөнхий сайдын хувьд Бурхан Халдунд хийсэн авиралт ард иргэдэд ямар өгөөж өгөв. Овооноос нь ард иргэдийн хуримтлуулсан цөөн хэдэн төгрөгийг өдөр бүр нэмэгдэх зээлийн хүүнд өгөх гэж зорив уу. Эзэн Чингис хаантай уулзав уу. Эцсийн бүлэгт таны миний эрх ашигт үйлчлэх юуг бүтээв. Монгол хүн амны бэлгээр гэдэг. Энэ явдлыг ингэсгээд л дуугүйхэн өнгөрөөнө. Гэхдээ бид өөрсдийнхөө эрх ашгийг хамгаалуулах гэж тэднийг сонгосноос бус бидний мөнгөөр зугаац гэж сонгоогүй. Гуравдугаарт, нийслэлийн гудамжаар дохиогоо хангинуулан сүржигнэх төрийн хамгаалалтынхан энэ үед нь хаахна явсан юм бол. Гүйцэтгэх засаглалын тэргүүнээ унтаа сэрүүнд ч хамгаалах үүрэг хүлээж байдагсан. Өмнөх Ерөнхийлөгчийн үед ч тэр Алтай Таван богдод золтой л нисгэчихээгүй шүү дээ. Хэн хэзээ энэ албан тушаалыг хашиж байх нь хамаагүй аюулгүй байдлыг нь хамгаалах тэдний үүрэг шүү дээ.

Н.Бадамжав