Монгол Улс шинэ Үндсэн хуулиа баталсны 20 жилийн ой энэ жил тохиож байгаа. Энэ чухал үйл явдлын тэгш ойн жил тохиож байгаатай холбогдуулан ойг тэмдэглэн өнгөрүүлэх ажлын хэсгийнхэн өнөөдөр Төрийн ордонд хэвлэлийн бага хурал хийлгэлээ. Засгийн газар ирэх оны нэгдүгээр сарын 13-ны өдөр тохиох Монгол Улсад Ардчилсан Үндсэн хууль батлагдсаны 20 жилийн ойн ажлыг зохион байгуулах комиссыг УИХ-ын Төрийн Байгуулалтын Байнгын Хорооны дарга Ж.Сүхбаатар УИХ-ын гишүүн, Хуульзүйн байнгын хорооны дарга Д.Одбаяр, УИХ-ын гишүүн Н.Батбаяр, Н.Ганбямба, Д.Балдан-Очир, З.Алтай болон ‘’Ардчилсан үндсэн хууль тогтоогчдын холбоо’’-ны тэргүүн Б.Мижид, дэд тэргүүн Л.Дашням нарын бүрэлдэхүүнтэйгээр байгуулсан юм. Энэ удаа хуралд ажлын хэсгийн ахлагч Ж.Сүхбаатар, Б.Мижид нар оролцсон бөгөөд ойн хүрээнд явуулахаар төлөвлөсөн ажлаа дэлгэлээ. Үндсэн хуулинд байдаг “Мэдэгтүн сахигтун” гэсэн үгийн чухлыг хүн бүрт ойлгуулах нь хамгийн чухал гэж ажлын хэсгийнхэн үзсэн тул энэ чиглэлээр их ажил зохион байгуулахаар төлөвлөсөн байна. Мөн Үндсэн хуулиндаа үнэлэлт дүгнэлт өгөх, Шинэ Үндсэн хууль батлах адармаатай, хэцүү боловч нэр хүндтэй ажлыг нугалсан гишүүддээ зориулсан дурсгалын баганыг босгох зэрэг ажлыг ойн хүрээнд амжуулахаар төлөвлөжээ.