Өнгөрөгч долоо хоногт улс төр нийгмийн амьдрал онцлох үйл явдлаар дүүрэн өдрүүд болж өндөрлөлөө. Олон жилийн турш зөвхөн цаасан дээр хэрэгжиж ирсэн орон сууцны хөнгөлөлтэй зээлийн асуудлыг Засаг төр нэг мөр болгон эцэслэсэн юм. Түүнчлэн урин цагт улс төрийн хүчнүүд ээлжит жагсаал цуглаан хийдэг уламжлал ч энэ долоо хоногийг тойрсонгүй. Ингээд өнгөрөгч долоо хоногт болсон   олон нийтийн анхаарлыг татсан мэдээллээс товчлон хүргэе.

Орон сууцны хөнгөлөлттэй зээл олгоно

Засгийн газрын өнгөрөгч бямба гарагийн хуралдаанаар орон сууцны  хөнгөлөлтэй зээлийг иргэдэд олгох асуудлыг шийдвэрлэсэн нь олон хүний магнайг тэнийлгэсэн мэдээлэл байв.

Шинээр баригдаж бүрэн ашиглалтад орсон, 80 ам.метрээс дээшгүй талбай бүхий орон сууц, эсвэл ашиглагдаж байгаа хуучин орон сууцнаас худалдан авахаар хүсэлт гаргасан, орон сууцны нийт үнийн дүнгийн 10-30 хувийн урьдчилгаа төлбөрийг төлсөн иргэдийг жилийн 8 (-,+1) хувийн хүүтэй, 20 хүртлэх жилийн хугацаатай, орон сууцны хөнгөлөлттэй зээлд хамруулах харилцааг зохицуулах журмыг баталж, ипотекийн зээлийг арилжааны бүх банкуудаар дамжуулан иргэдэд олгох ажлыг зохион байгуулахыг Эдийн засгийн хөгжлийн сайд Н.Батбаяр, Барилга, хот байгуулалтын сайд Ц.Баярсайхан нарт даалгасан юм.

Мөн орон сууцны нийлүүлэлтийг дэмжих зорилгоор 2013-2014 онд ашиглалтад оруулахаар төлөвлөсөн, санхүүжилтийн асуудалтай байгаа орон сууцны барилгуудын судалгааг үндэслэн үе шаттайгаар санхүүжүүлэх ажлыг арилжааны банкуудаар дамжуулан зохион байгуулахыг үүрэг болголоо.

Туркийн Ерөнхий сайд айлчлалаа

Ерөнхий сайд Н.Алтанхуягийн урилгаар манай оронд Бүгд Найрамдах Турк Улсын Ерөнхий сайд ноён Рэжэп Тайип Эрдоаны  айчилсан. Энэхүү айлчлалын үр дүнд Туркийн иргэдийн Монгол Улсад визгүй зорчих нөхцлийг бүрдүүлэх шийдвэрийг Засгийн газар гаргаж, ингэснээр хоёр орны иргэд харилцан визгүй зорчдог болох шийдвэр гаргасан юм.

Түүнчлэн  зам гүүр, гэр хорооллыг дахин төлөвлөж, барилгажуулах болон арьс, шир, ноос ноолуур боловсруулж, бэлэн бүтээгдэхүүн үйлдвэрлэх, аялал жуулчлалыг хөгжүүлэх зорилгоор дэд бүтцийг сайжруулах чиглэлд хоёр тал хамтран ажиллахаар тохиролцлоо.

Мөн хоёр орны авиа компаниуд хамтран Истанбул-Бишкек-Улаанбаатар-Сөүл гэсэн чиглэлд долоо хоногт гурван удаа ачааны нислэг хийх санал ч гарав. Гэвч үүнээс илүү чухал нь орон сууц барихад хамтран ажиллахаар болсон юм.

Ерөнхий сайдыг огцруулах саналыг өргөн барилаа

Өнгөрөгч долоо хоногт олон нийтийн анхаарлын төвд байсан гол асуудлын нэг нь сөрөг хүчнийнхэн Засгийн газрын тэргүүнийг огцруулах саналыг УИХ-ын даргад өргөн барьсан үйл явдал байв.

УИХ-ын гишүүн, МАН-ын дарга Ө.Энхтүвшин, УИХ дахь МАН-ын бүлгийн дарга Н.Энхболд нар Ерөнхий сайд Н.Алтанхуягийг огцруулах тухай саналаа энэ сарын 12-ны өдөр УИХ-ын дарга З.Энхболдод өргөн барьсан юм.

Тэгвэл энэ долоо хоногийн пүрэв гарагт чуулганы нэгдсэн хуралдаанаар уг асуудлыг хэлэлцэхээр болсон байна.

Ерөнхий сайд Н.Алтанхуягийг огцруулах тухай санал гаргах болсон үндэслэлээ МАН-ынхан “Шинэчлэлийн Засгийн газар байгуулагдан ажилласан өнгөрсөн найман сар гаруйн хугацаанд улс орны эдийн засаг хүндэрч, бараа, бүтээгдэхүүний үнэ өсч, гадаадын хөрөнгө оруулалт хумигдаж байгаа гэнэ.

Гэвч Засгийн газар энэ бүгдэд дорвитой арга хэмжээ авахгүй байгаа нь Ерөнхий сайдыг огцруулах үндэслэл болно” гэж тайлбарлажээ.

Шар цэцэгтэй жагсаал

Урин цаг ирэхээр улс төрийн хүчнүүд жагсаал зохион байгуулдаг уламжлал тогтоод удаж байна. Энэ удаагийн МАХН-ын жагсаал их өвөрмөц болж өндөрлөв. Учир нь тэд МАХН-ынхан дарга Н.Энхбаярынхаа баривчлагдсан нэг жилийн “ой”-оор Улсын мөрдөн байцаах газар, Шүүхийн шийдвэр гүйцэтгэх ерөнхий газар, Улсын Дээд шүүх гэсэн маршрутаар баасан гаригт жагсаал хийж, тус газруудын үүдэнд шар цэцэг шидэлж эсэргүүцлээ илэрхийлсэн.

Жагсаалынхаа талаар УИХ-н гишүүн З.Баянсэлэнгэ “Ард түмнийнхээ төлөө  дуугарсан МАХН-ын дарга Н.Энхбаярыг   хэлсээр гүтгэж баривчилсан нэг жилийн ой тохиож байна. Шар цэцэг нь муу муухай зүйлд эмгэнэл илэрхийлэх гэсэн утгыг илэрхийлж байгаа юм. Түүнээс биш хэн нэгнийг доромжилсон зүйл байхгүй. Өөр хэн нэгнийг бүү хэлмэгдүүлээсэй гэдэг үүднээс энэхүү жагсаалыг зохион байгууллаа” гэсэн юм.

Ерөнхийлөгчийн сонгуулийн тов гарлаа

Чуулганы нэгдсэн хуралдаанаар Ерөнхийлөгчийн ээлжит сонгуулийг  энэ дүгээр сарын 22-ны өдрөөс эхлэн товлон зарлах, Монгол Улсын Ерөнхийлөгчийн анхан шатны сонгуулийн санал хураалтыг 2013 оны 6 дугаар сарын 26-ны өдөр явуулах асуудлыг хэлэлцсэн шийдсэн юм.

Олонхын саналаар Монгол Улсын Ерөнхийлөгчийн ээлжит сонгуулийг 2013 оны  дөрөвдүгээр сарын 22-ны өдрөөс эхлэн товлон зарлах, Монгол Улсын Ерөнхийлөгчийн анхан шатны сонгуулийн санал хураалтыг 2013 оны зургадугаар сарын 26-ны өдөр явуулах, Монгол Улсын дипломат төлөөлөгчийн газар байрладаг гадаад улсад байгаа сонгуулийн эрх бүхий иргэдийн саналыг 2013 оны зургадугаар сарын 14-16-ны өдрүүдэд авахаар товлосон юм.

Н.Бүжин