Монгол Улсын Шадар сайд Д.Тэрбишдагва Онцгой байдлын ерөнхий газрын даргад хурандаа цол олгосон нь Монгол Улсын Үндсэн хуулийн холбогдох заалтыг зөрчсөн эсэх тухай асуудлаар Үндсэн хуулийн цэц маргаан үүсгэн шалгасан билээ.

Иргэн П.Сэрчмаагийн өргөдлийн дагуу үүсгэсэн ийнхүү маргааныг хянан шийдвэрлэх Цэцийн их суудлын хуралдааныг 2013 оны дөрөвдүгээр сарын 17-ны өдөр  хийхээр товлосон байв. Гэвч хуралдаанд бэлтгэх хугацаанд Монгол Улсын Засгийн газрын гишүүн, Шадар сайд Д.Тэрбишдагва тушаал гаргаж, Онцгой байдлын ерөнхий газрын даргад хурандаа цол олгосон өмнөх шийдвэрээ хүчингүй болгосон тухайгаа Үндсэн хуулийн цэцэд мэдэгдсэн байна. Нэгэнт Үндсэн хуулийн зөрчлийн шинж арилж, иргэн П.Сэрсмаагийн өргөдлийн шаардлага хангагдсан тул дээрх маргааныг хянан шийдвэрлэх ажиллагааг зогсоож улмаар 2013 оны дөрөвдүгээр сарын 17-ны өдөр хийхээр товлосон Үндсэн хуулийн цэцийн их суудлын хуралдаан цуцалжээ. Үүний өмнө Ерөнхий сайд Н.Алтанхуяг ч Үндсэн хуулийн холбогдох зүйл заалтыг зөрчин Тагнуулийн Ерөнхий газрын дэд даргыг томилсон асуудал Үндсэн хуулийн цэцэд маргаан үүсгэсэн юм.  Уг маргааныг хэлэлцэхийн өмнөх өдөр Засгийн газрын тэргүүн  өөрийнхөө гаргасан шийдвэрийг хүчингүй болгож байв.

Н.Бүжин