Жолооч нар хотын түгжрэлд бухимдаж, хагарч гэмтсэн замын бартаа саадад авъяасаа шалган байж хөдөлгөөнд оролцдог. Мөн тэдний байнгын бухимдлыг төрүүлдэг нэг сэдэв нь шатахуун түгээгүүрийн газрууд бензин түлшээ дутуу шахдаг гэх гомдол. Энэ талын мэдээлэл ч ШӨХТГ-т маш ихээр ирдэг аж. Тиймээс хэрэглэгчдийн гомдлын дагуу өнөөдөр шалгалт хийлээ. Шалгалтыг ШӨХТГ, Стандартчилал хэмжил зүйн газар хамтран зохион байгуулав. . Хамгийн эхэнд очсон Тасганы овооны баруун урд байрлах “Петровис” шатахуун түгээгүүрийн тог нь тасарсан байна гэсэн тул шалгалт хийх боломжгүй болсон. Харин зүүн талд нь байрлах “Содмонгол” шатахуун түгээгүүр хэвийн үйл ажиллагаагаа явуулж байв. . Шалгалтын багийнхан тус шатахуун түгээгүүрийн газрын холбогдох албаныханд ирсэн зорилгоо товч танилцуулсан. Үүний дараа шатахууны шахалт тээврийн хэрэгсэлд үнэн зөв  ордог эсэхийг шалгахаар болов. Шатахуун түгээгүүрийн самбарын заалтыг 500 мл-т тааруулан зорилалтын саванд шахаж, дараа нь шилэн саванд шатахуунаа  шахаж үзэхэд ямар ч зөрүү гараагүй. Дараа нь Стандартчилал хэмжилзүйн газрын явуулын лабораторит 10 литр түлш шахаж, хэмжилт хийсэн. Хэмжилтээр тус шатахуун түгээх газар хэрэглэгчдэд самбарт бичсэн заалтаар түлш, шатахуун нийлүүлдэг гэдгийг тогтоов. . Гурав дахь шатахуун түгээгүүр болох “Содмонгол”-ын хажууханд нь байх “Синчи Ойл”-ыг шалгах гэсэн боловч тог нь тасарсан гэв. Тиймээс Баянбүрдийн тойргийн замын баруун хойно байрлах “М-Ойл” шатахуун түгээгүүрийг шалгав. Энэхүү шалгалтаар мөн ямар нэгэн зөрчил илрээгүй бөгөөд Стандартчилал хэмжилзүйн газраас жилд хоёр удаа шатахуун түгээгүүрийн газруудын бензин түлшний шахалтыг шалгаж, лацдаж баталгаажуулдаг тул хэрэглэгчдээс ирсэн гомдол нь бодитой бус мэдээлэл байна хэмээн албаныхан мэдэгдлээ. П.Наран