Жил бүр уламжлал болгон зохион байгуулагддаг Австрали дахь монголчуудын сагсан бөмбөгийн аварга шалгаруулах тэмцээнийг Австрали дахь Монголчуудын холбоо болон сагсан бөмбөгийн Nomads League хамтран энэ сарын 21-ний өдөр Сидней хотод зохион байгуулав. Австрали дахь Монголчуудын холбооны тэргүүн Ю.Амартүвшин, Монгол Улсаас Австралийн холбооны улсад суугаа Онц бөгөөд Бүрэн эрхт Элчин сайд Р.Болд, Nomads League-ийн санаачлагч Г.Батзаяа нар тэмцээнийг нээж, энэ үеэр Б.Энхбаяр морин хуур хөгжимдөж, Т.Пунцагдорж "Халуун элгэн нутаг" дуугаар ая барилаа.Тэмцээнд эрэгтэй 9, эмэгтэй 4 багийн 100 гаруй тамирчид оролцсоноос эрэгтэйчүүдийн төрөлд "Эртэч шувуухайнууд" баг тэргүүн байр эзэлсэн бол "Шонхорууд" удаахь байрт шалгарч мөнгөн медаль хүртэв.  "Flash" багийн тамирчид хүрэл медаль хүртлээ. Эмэгтэйчүүдийн төрөлд Канберра хотоос ирж оролцсон "Canberra Girls" баг алтан медаль хүртсэн бол мөнгөн медалийг "Хар Сарнай" багийн тамирчид хүртэв. Хүрэл медалийн эзнээр "Oaks-ийн охидууд" баг шалгарлаа. Тэмцээний эрэгтэй шилдэг тамирчнаар Б.Жамъянжав шалгарсан бол эмэгтэйчүүдийн шилдэг тамирчнаар "Canberra Girls" багийн тамирчин О.Батхишиг тус тус шалгарсан байна хэмээн Гадаад харилцааны яамнаас мэдээллээ.