Шатахуун түгээх станцууд түлш, шатахуунаа дутуу шахаж, хэрэглэгчдийг хохироодог талаар ШӨХТГ-т гомдол тасардаггүй. Тиймээс хэрэглэгчдийн гомдлын дагуу энэ сарын 18-ны өдөр ШӨХТГ, Стандартчилал, хэмжил зүйн газар хамтран нийслэлийн хэд хэдэн ШТС-уудад гэнэтийн шалгалт хийсэн талаар бид өмнө нь мэдээлсэн билээ.

Шалгалтыг Гандангийн дэнжийн зүүн талд буюу Тасганы овооны баруун урд байрлах "НИК" компанийн “Петровис” шатахуун түгээгүүрийн газраас эхлүүлэхийг хүссэн ч цахилгаан нь тасарсан гэх шалтгаанаар зүүн талд нь байрлах “Содмонгол” шатахуун түгээгүүрийг шалгасан. Тус ШТС-ийг шалгахад үйл ажиллагаа хэвийн, түлш шатахууны шахалт хэвийн болох нь хэмжилт судалгаагаар батлагдсан юм.

Үүний дараа  “Содмонгол”-ын хажууханд нь байх “Синчи Ойл”-ыг шалгах гэсэн боловч бас л цахилгаан тасарсан гэх шалтгаанаар цуцлагдаж, Баянбүрдийн тойрогт орших “М-Ойл” ШТС-ийг шалгаж, ямар нэгэн зөрчил дутагдал илрээгүй тул шалгалтаа өөр газар үргэлжлүүлэхээр болсон аж.

Гэтэл шалгалтынхан Тасганы овоо өгсөж яваад цахилгаан нь тасарсан гэх “Петровис”-ын ШТС-ийн үйл ажиллагаа хэвийн явж байгаа харж, шалгахаар дахин очжээ. Тус түгээгүүрийн А80, А92 шатахууны шахалтыг шалгаж үзсэн байна. Шалгалтаар тус ШТС А80 бензинийг нэг минут тутамд 40 литрийг шахах ёстой байтал 20 литрийг шахаж байгааг Стандартчилал, хэмжил зүйн газрын ахлах мэргэжилтэн Ө.Оюунгэрэл болон ШӨХТГ-ын холбогдох албаныхан тогтоосон байна.

Уг нь Стандартчилал, хэмжил зүйн газраас ШТС-уудад шалгалт хийж, баталгаажуулдаг. Мөн шатахуун түгээх станц болгонд дотоодын хяналт гэж байх ёстой. Тиймээс А80 бензин дутуу шахагдаж байгааг тус ШТС-ынхан мэдэхгүй байх боломжгүй гэж үзсэн байна.  Түүнчлэн тэд түлш дутуу шахаж байгаа талаар энэ сарын 2-ны өдөр толгой компанидаа мэдэгдсэн ч ямар нэгэн хариу өгөөгүй байсан гэнэ.

Иймд тус ШТС-д дутуу шахалт нь санаатай үйлдэл үү, аль эсвэл фильтр, шугам хоолой зэрэг бусад нэгэн шалтгаанаар ийнхүү бага хэмжээгээр гарч байгаа эсэхийг тогтоох нарийн шалгалт хийгдэхээр болжээ.

Хэрэв тус компанийнхан мэдсээр байж хэрэглэгчдийг хуурч мэхэлсэн нь тогтоогдвол Мэргэжлийн хяналтын ерөнхий газрын Хэмжилийн нийлмэл байдлыг хангах тухай хууль,  Хэрэглэгчдийн эрх ашгийг хангах тухай хуулийн дагуу Петровис компанид хариуцлага тооцож, тусгай зөвшөөрөлийг цуцлах талаар ч яригдаж магадгүй гэнэ.

П.Наран