Энэрлийн бурхад хэмээн бидний сүслэн хүндэтгэдэг  цагаан халаатнуудын хууль бус үйлдлүүд хэрээс хэтэрсэн мэдээллүүд ар араасаа хөвөрсөөр  байна. Дөнгөж төрсөн нярайг халуун усаар түлсэн хэргийн дуулиан намжаагүй байхад Говь-Алтай аймагт хоёр сартай нялх хүүхдэд тарилга хийхдээ алдаа  гаргасан сувилагчийн тухай мэдээлэл ч чих дэлсэх болов.

Энхийн манаанд  тангараг өргөсөн эмч нараас эрлэгийн элч мэт авирладаг хүмүүс мэр сэр байгаа  нь нууц биш. Тэдний хариуцлагагүй үйлдлээс үүдэн хэдэн арван хүмүүс ээжийгээ, хүүгээ цаг бусаар бурханы орон руу илгээдэг нь нууц биш. Эмчийн тангаргаа огоорсон зарим нь алдаагаа хэзээ ч хүлээн зөвшөөрдөггүй. Тэд өөрсдийн  мэргэжлээ ашиглан өвчтөний түүх, онош засч,  хуурамч баримт бүрдүүлэх зэргээр хэргээс өөрсдийгөө мултлах арга сэддэг нь олон баримтаас харагдаж байна.

Сүүлийн үед ЭМЯ, томоохон эмнэлгүүд түүний удирдах албан тушаалтнуудтай холбоотой чих халууцуулсан бусармаг явдал хэвлэл мэдээллээр гарах боллоо.Тодруулбал,нийслэлийн Баянгол дүүргийн Цагдаагийн хэлтэст хүчингийн  хэрэгт сэжигтнээр татагдан Цагдан хорих  461 дүгээр ангид хоригдож байсан Л.Батмөнх гэх этгээдийг ялаас мултлах арга сэдсэн нэр зүстэй,  нэгэн эмчийн талаар баримт түшье.

Бидний өгүүллийн муу дүрийн баатар бол Шастины нэрэмжит гуравдугаар эмнэлгийн Стратеги төлөвлөлт эрхэлсэн орлогч дарга Л.Баярцэцэг. Тэрбээр  өөрийн  төрсөн ах болох хүчингийн хэргийн  сэжигтэн Л.Батмөнх гэгчийг эрүүл байхад нь элэгний хүнд өвчтэй болгон оношиийг нь өөрчилж, ялаас мултлахаар чармайж байсан нь цагдаагийнхны хараанаас мултарсангүй. Өдгөө төрсөн ах Л.Батмөнхийн хамт Л.Баярцэцэг  нь Баянгол дүүргийн Цагдаагийн хэлтэст шалгагдаж байна. Эх сурвалжийн мэдээллээр 2012 оны оны эхээр Цагдан хорих 461 дүгээр ангиас таван сэжигтэн Шастины нэрэмжид гуравдугаар эмнэлэгт хүргэгдэн иржээ. Тэдний дотор   хэргийн эзэн Л.Баярцэцэгийн төрсөн ах Л.Батмөнх элэгний хүнд өвчтэй гэсэн оноштэй тус эмнэлэгт ирж хэвтсэн байх юм.

Улмаар биохимийн эмч Ш.Өнөржаргал нөгөөх өвчтөндшинжилгээ хийхэд цоо эрүүл гарсан байна. Өөрөөр хэлбэл, элэгний хүнд өвчтэй хэзээ мөдгүй  тэнгэрт халих дөхсөн Л.Батмөнхийн шинжилгээний хариу хэд хэдэн удаа эрүүл гарсанд Ш.Өнөржаргал эмч  гайхширч хоцорчээ. Улмаар  уг хэргийн учрыг олохоор  асуудлыг нэлээд нухацтай  авч үзсэн байна.Тус эмнэлгийн бүх шинжилгээ цахим программ хангамжид суурилсан хөндлөнгийн хүн гар хүрэх аргагүй цаасгүй технологиор явагддаг тулцахим архиваас өмнөх шинжилгээний хариуг үзэх, хэний зөвшөөрлөөр хэзээ ямар шинжилгээ хийж хадгалсан нь тов тодорхой байдаг тул эргүүлж нягтлахад тийм ч төвөгтөй бус байв.

Тухайлбал, Ш.Өнөржаргал эмч сэжигтэн Л.Батмөнхийн мэдээллүүдийг эмнэлгийн “Цахим эмнэлэг-eHospital” програм хангамжийн лабораторийн архивт  бүртгэгдсэнийг инженерийн тусламжтай шалгаж үзжээ. Шалгах явцад дээрх этгээдийн өнгөрөгч 2011 оны есдүгээр сарын 14-нд хийсэн элэгний шинжилгээний баталгаажуулсан үзүүлэлтүүдийг 2012 оны арваннэгдүгээр сарын01-ний өдөр буюу жилийн дараа их эмч А.Баярзаяа  өмнөх шинжилгээний хариуг өөрчлөн хэт ихэсгэж засварласан байжээ.

Мөн  өнгөрөгч 2012 оны арваннэгдүгээр сарын 1-ний өдөр Л.Баярцэцэг өөрөө ахынхаа элэгний шинжилгээ хийх бичиг явуулсан аж. Түүнийг нь цахим бүртгэгч мөн өдрөө яаралтай горимоор бүртгэж лабораторид илгээжээ. Энэхүү шинжилгээний хариуг их эмч А.Баярзаяа 2012 оны аравдугаар сарын 31-ний өдөр буюу шинжилгээнд явуулсан өдрөөс нэг хоногийн өмнө хариу нь гарснаар программд шивж оруулсан байх юм. Үүнээс улбаалаадлабораторийн программ хангамжийн архивын цахим протоколд энэхүү шинжилгээг хэн гэдэг лаборант хийснийг шалгахад мэдээлэл олдоогүй болно. Тиймээс сэжигтэн Л.Батмөнхийн шинжилгээг ямар нэг цус шинжлэлгүйгээр хариуг хуурамчаар бичсэн гэсэн дүгнэлтэнд хүрсэн байна. Энэ мэтчилэнгээр Л.Баярцэцэг даргын албан тушаалаа ашигласан хууль бус үйлдлүүд хөвөрнө.

.

Баримт1:  Улсын 3 дугаар төв эмнэлгийн “Цахим эмнэлэг-eHospital” программ хангамжид 26985 дугаартай бүртгэгдсэн Лхамжавын Батмөнхийнүйлчлүүлэгчийн дэвтрийг үзвэл 2012 оны арванхоёрдугаар сарын 01-ны өдөр зөвлөх поликлиник эмчийн бүртгэлийн эрхээр, CITO(яаралтай)горимоор шинжилгээнд Л.Баярцэцэг(Л.Батмөнхийн төрсөн дүү) илгээснийг цахим бүртгэгч Бя.Ариунзаяа 2012-11-01-ний өдөр шинжилгээ хийхээр бүртгэжээ. Харин шинжилгээг лабораторийн их эмч А.Баярзаяа 2012-10-31өдөр хийсэн мэтээр харагдаж байна.       

Хавсралт2a

Мөн Л.Баярцэцэгийн даалгавраар  Л.Батмөнхийн 2013 оны нэгдүгээр сарын17,18-ны өдрийн элэгний шинжилгээ, С вирусын шинжилгээг мөн л өөрчлөлттэй болгон дээрх эмч лаборант нарзасварлажээ. Өөрөөр хэлбэл, элэгний өвчингүй Л.Батмөнхшинжилгээний хариугаар өвчтэй болсон гэсэн үг. Энэхүү бусармаг асуудлыг илрүүлсэн их эмч Ш.Өнөржаргал үүргийнхээ дагуу ажил хариуцсан орлогч дарга Л.Баяцэцэгт мэдэгдэхэд“Програм хангамж нь алдаа биз, эмч нарын хооронд ийм асуудал байдаг л юм” хэмээн жишим ч үгүй хариулжээ. Үйлчллүлэгчийн оношлогоог үнэн зөв хийж эмчлэн эрүүлжүүлэх, иргэдийн амь насны асуудлыг шийдвэрлэх эрх бүхий  хариуцлагатай алба хашдаг эл эрхэм  албан тушаалаа урвуулан хувийн ашиг сонирхолдоо хөтлөгдөнэмч, сувилагчаар  хууль бус зүйл хийлгэсэн нь наад зах нь эмчийн тангараг ёс зүйгээ алдсан цаашилбал Эрүүгийн хуулийн олон зүйл заалтыг зөрчсөн гэмт үйлдэл болоод байгаа юм.

Эмнэлгийн хариуцлагатай албан тушаалтан ингэж хууль зөрчсөн нь үйлчлүүлэгчид эмнэлэгт итгэх итгэл буурахаас гадна мянга мянган иргэдийн эрүүл мэндийн мэдээлэл болон ажил үйлчилгээний аюулгүй байдлын асуудалд ч сөргөөр нөлөөлж байна.  Өдгөө уг ноцтой асуудлыг нийслэлийн Баянгол дүүргийн цагдаагийн хэлтэсшалгаж буруутай этгээдүүдийг сэжигтнээр татжээ.

Харин Л.Баярцэцэг гэгч нь уг хэргийг үйлдээгүй хэмээн мэлзэхээс гадна энэ талаар мэдээлэл бэлтгэсэн сэтгүүлчид руу  үл таних хүмүүсээр утсаар яриулах зэргээр ажил үүрэгт нь дарамт учруулсаар байна.

.

Шинжилгээг гаргасан:      СМТА-ны инженер                    Л.Бат-Эрдэнэ

2013 оны 03 сарын 06.     17 цаг 06 минут

.