Хаврын урин дулаантай зэрэгцэн, барилгын компаниудын ажил өрнөж байна. Барилгын ажил эхлэхтэй зэрэгцэн, гэмтэж бэртсэн, хүний амь эрсдсэн гэх харамсалтай мэдээлэл гарч эхэлдэг. Тэгвэл өнөөдөр “Нарны гүүр”-ны зүүн талд “Хурд” компанийн барьж байгаа орон сууцны барилга дээр осол гарч, хүн бэртсэн гэх мэдээлэл бидэнд ирсэн.

.

Уг мэдээллийн дагуу осол гарсан гэх газрыг зорин очсон юм. Уг осол Баянгол дүүргийн III хороо, Дунд голын хойд талд буюу Нарны гүүр, Энхтайваны гүүрний хооронд байрлах “Хурд” компанийн “Нарны хороолол”-д болсон аж.  Өглөөний 09.30 цагийн орчим тус хорооллын нэг барилгын орчимд осол гарч хүний амь эрдсэн гэдгийг албан бус эх сурвалж бидэнд мэдээлээд байсан юм.

Уг мэдээллийг тодруулахаар тус барилгын хашаа руу нэвтрэхийг хүссэн ч “Хөдөлгөөнт бай” хамгаалалтын албаныхан биднийг дотогш нэвтрүүлэх боломжгүй гэлээ. Дотогш нэвтэрч үнэн бодит мэдээлэл авах ёстой гэдгээ дахин сануулахад хэн нэгэнтэй утсаар ярьж зааварчилгаа авсан хамгаалалтын албаны залуу “Хэвлэлийнхэнийг дотогш нэвтрүүлж болохгүй гэж байна” гэв. Тиймээс түүнээс 9811.... бүхий дугаарыг тэмдэглэн авч холбогдон дотогш нэвтрэх хүсэлтээ илэрхийлэхэд “Би мэдэхгүй. Дотогш нэвтрэх шаардлага байхгүй. Мэдэхгүй” гээд утсаа тасалчихав.

.

Уг хорооллыг барьж буй барилгын талбайд хүрэхийн тулд 2-3 давхар хашаа, хамгаалалтыг даван дотогш нэвтрэх боломжтой аж. Гэвч сэтгүүлчдэд хаалттай үйл ажиллагаагаа явуулж буй “Хурд” компанийнхан, онцгой, цагдаагийнханыг саадгүй нэвтрүүлж байсан юм. Харин бид ослын газрын зургийг авч баримтжуулахыг хүссэн ч “Нарны хороолол” гэх  олон зэрэгцээ барилгуудын яг алинд нь осол гарсныг мэдэх боломж байсангүй. Гэхдээ албан бус эх сурвалжийн мэдээлснээр нэг барилгынх  нь  дээд давхараас барилгын тулаас төмөр буюу сапуду доош унаж, доор зогсож байсан 40 орчим насны эрэгтэйн толгой дээр унасан гэнэ. Ослын улмаас тэрээр газар дээрээ амьсгал хураасан бөгөөд холбогдох албаныхан ослын шалтгааныг тогтоохоор ажиллаж байгаа аж. Харин тухайн үед ажиллаж байсан барилгачдыг өнөөдөр харьж болно хэмээн тараасан байна.

.

Тус хорооллын барилгууд хоорондын зай ойр, хамгаалалтын торон хаалтгүй барилгын ажил явагдаж байсан ба “Хурд” компанийн захиалгаар "Минимакс интернешнл" ХХК-ийн хариуцан ажиллаж байсан барилгад осол гарсан байх магадлалтайг эх сурвалж мөн мэдээлсэн. Энэхүү “Нарны хороолол” -ын зүүн талд  шатахууны томоохон агуулахууд байршдаг  бөгөөд барилга ашиглалтад орсон ч иргэд, оршин суугчдад аюултай бүсэд хамаарагдах бололтой.

Ямартаа ч, өнөөдөр уг хорооллыг барилцаж байсан 40 орчим насны эрэгтэй амь насаа алдсан гэдгийг тус компанийнхан нуухыг оролдлоо. Хоёр сар гарангийн өмнө бас тус хорооллын хашаа, эмнэлэг, онцгой, цагдаагийнхан ирж байсныг ойр орчмын байгууллагуудаас мэдэгдэж байсан юм. Магадгүй өмнө нь ч бас хэн нэгний амь нас, эрүүл мэндэд хохирол  учирч, мэдээллийг нуун дарагдуулсан байж болзошгүй тул холбогдох байгууллагууд анхааралдаа авна биз ээ.

.

Өнгөрсөн оны есдүгээр сард мөн л Хан-Уул дүүргийн 14-р хорооны нутаг дэвсгэрт орших Хурд компанийн Рапид Харш орон сууцны хороололд баригдаж буй нэгэн барилгын өргөгч кран нурж, кранист нь болох 26 настай залуу амиа алдсан харамсалтай хэрэг гарсан. Тухайн үед “Хөдөлгөөнт бай” хамгаалалтын албаныхан мөн хэвлэл мэдээллийнхэнийг дотогш нэвтрүүлээгүй гэдэг. Түүнчлэн энэ үеэр мэргэжлийн хяналтын байгууллагууд “Хурд” компанийн захиалгаар баригдаж буй хэд хэдэн барилгад шалгалт хийхэд , цагийн ажилчдадаа хөдөлмөр хамгааллын хувцас хэрэглэл өгдөггүй, барилгын ажлын аюулгүй ажиллагааны нөхцөл бүрдүүлээгүй зэрэг зөрчлүүд илэрч байсан юм билээ.

.

“Хурд” компанийн эзэн нь УИХ-ын гишүүн, Б.Чой­жилсүрэн бөгөөд нийслэлийн хамгийн ашигтай байршилд хороолол сүндэрлүүлсээр хэдэн жилийн нүүр үзэж буй. Түүний эзэмшлийн компанийн захиалгаар баригдаж байсан барилга дээр хөдөлмөрийн аюулгүй байдал хангаж шат, тавцан, тор, хүрээ татаагүйн улмаас ийнхүү дахин нэг хүний амь эрсдлээ. Нөгөө талаар ажилчдын амь нас, эрүүл мэндтэй холбоотой асуудлаа нуух алхам хийж байгаагаас харахад, энэ мэт осол тус компанийн барилгуудад цөөнгүй гардаг болов уу гэх хардах сэтгэлийг төрүүлж байна.

Хамгийн гол нь барилгын ажлын захиалагч, гүйцэтгэгч нарын хайхрамжгүй байдлаас үүдэн өнөөдрийн харамсалтай хэрэг дахин хэд хичнээн гарахыг хэлж мэдэхгүй ч, “Хурд”-ынхаан барилгачдын амь насаар “туг тахих”- аа хэзээ болих вэ.

П.Нарандэлгэр

Гэрэл зургийг Б.Мөнх-Эрдэнэ