Хүүхдийг зодож шийтгэх, дарамт хүчирхийлэлд оруулахад хүүхэд сэтгэлийн гэмтэл авч,  оюуны хөгжилд нь сөргөөр нөлөөлдөг болох нь олон улсын болон дотоодын олон судалгаагаар батлагдаад байна.   Тиймээс хүүхдийн эсрэг аливаа хүчирхийллийг нийгмээрээ үл тэвчих, хүүхдийн бие махбод, сэтгэл санааны эсрэг шийтгэлийг таслан зогсоох зорилгоор 1998 оноос АНУ-д 4 дүгээр сарын 30-ны өдрийг “Хүүхдийг зодож шийтгэхгүй байя!” уриан дор тэмдэглэж эхэлсэн.   2001 оноос дэлхийн бусад улс орнууд нэгдэн энэхүү өдрийг олон улсын түвшинд төрөл бүрийн арга хэмжээ зохион байгуулдаг болсон юм. Үүний хүрээнд дэлхийн олон оронд эцэг эхчүүд хүүхэдтэйгээ хэрхэн харилцаж, тэднийг яаж хүмүүжүүлж байгаа тухайгаа эргэцүүлэн, хүүхэд хүмүүжүүлэх эерэг аргуудыг эрэлхийлэхийг хүн бүрт уриалдаг юм.   Манай улсад анх 2008 онд Хүүхдийг Ивээх Сангийн  санаачлагаар  “Хүүхдийг зодож шийтгэхгийг таслан зогсооход” чиглэсэн нөлөөллийн олон талт ажлуудыг жил бүрийн энэ өдөр зохион байгуулан, олон улсын өдрийг тэмдэглэн өнгөрүүлдэг болсон.   Өнөөдөр Тусгаар тогтнолын талбайд Хууль Зүйн Яам, Чингэлтэй дүүргийн ИТХ, дүүргийн Гэмт хэргээс урьдчилан сэргийлэх ажлыг зохицуулах зөвлөл, дүүргийн ЗДТГ, Хүүхэд Хамгааалал Үндэсний Сүлжээ, Хүүхэд Хүүхдийн Төлөө ТББ, хүүхдүүд хамтран хүүхдийг зодож шийтгэхийг таслан зогсоох, олон нийтэд мэдээлэл өгөх өдөрлөгийн арга хэмжээг зохион байгууллаа.   Өдөрлөгийн арга хэмжээний үеэр хүүхдийг зодож шийтгэхийг хориглон хуульчилахыг дэмжсэн олон нийтийн гарын үсэг цуглуулах, хүүхдүүдийн мэндчилгээ,  эцэг эхчүүдэд зориулсан хүүхэд хүмүүжүүлэх эерэг аргын зөвлөгөө, мэдээллүүд, хүүхдийн бүтээлийн болон гэрэл зургийн үзэсгэлэн дэлгэгдээ.   Энэ жилийн үйл ажиллагаагаар дараах агуулгын хүрээнд олон нийтэд мэдээлэл түгээлээ. Тухайлбал, хүүхдийн сэтгэлд шарх үлдээх хүмүүжлийн арга байх ёсгүй, хүүхдийг урам зоригоор тэтгэж, ухаалаг зөв аргаар хүмүүжүүлье, хүчирхийлэлгүй өнөөдөр-хүчирхийлэлгүй ирээдүй зэрэг сэдвийг чухалчилсан байна. Хамгийн гол нь хүүхэд насыг хүчирхийлэлгүй байх ёстой хэмээн хуульчлах нь хүчирхийлэлгүй ирээдүйн баталгаа хэмээн зохион байгуулагчдын зүгээс онцлон сануулсан арга хэмжээ боллоо.   П.Наран