Монголын анхны рок хамтлаг “Харанга”-ынхан анх 1989 оны аравдугаар сарын 26-нд Драмын театрын дэргэд байгуулагдаж байсан гэдэг. Анхандаа нэргүй байж байгаад Драмын театр, Ардын дуу бүжгийн чуулгын бүх уран бүтээлчдын дунд нэр зохиох уралдаан зарласан юм билээ. Тэгтэл Ардын дуу бүжгийн чуулгын бүжигчин Д.Сүхбаатар "Харанга" гэж нэрийг санал болгосноор тэд монголын рок попын ертөнцөд нэрээ дуурсгаж явна. Анхны тоглолт буюу "Амьдрал" тоглолтынх нь тасалбар 30 минутын дотор бүгд зарагдаж байсан гэдэг. “Харанга”-ын "Үгүйлэн санана", "Шүүдэр цэцэг", "Энэ бол дурлал биш" гээд л маш олон хит дуунууд одоо ч фенүүдийнх нь хамгийн дуртай дуунуудынх нь нэг байсаар л байдаг. Рок попын ертөнцөд өөрийн орон зайгаа хэдийнээ бататгаж, хэзээ ч үнэ цэнэтэй хэвээо уран бүтээлчид бол яахын аргагүй “Харанга”-ынхан гэдэгт маргах хүн үгүй биз ээ. Тэгвэл тус хамтлагийн гоцлол гитарчин МУГЖ Ц.Энхманлай, гитарчин Я.Одсүрэн нар манай дуранд өртсөнийг сонирхуулж байна. Я.Одсүрэнгийн хувьд энэ сарын 17, 18-нд өөрийн бие даасан “Оогий Харангатайгаа, гитартайгаа, найзуудтайгаа” гэх тоглолтоо хийх гэж байгаа юм. Тэрбээр энэхүү тоглолтоор урлагт зүтгэсэн 25 жилийн ойг тохиолдуулан  хамтлагийн түүхийг фенүүддээ эргэн сануулсан олон олон гэнэтийн бэлгээр дүүрэн  хоёр үдшийг өнгөрүүлэхээр төлөвлөөд байгаа юм. П.Наран