Нийслэлийн Цагдаагийн Газрын дарга асан, өдгөө Москвад Консулаар сууж байгаа  Н.Ганболдыг   Авлигатай тэмцэх газрын даргын суудалд суулгахаар эндээс санал тавьсан ч, тэр татгалзсан хариуг өгсөн гэх мэдээлэл байсан. Гэтэл Хууль зүйн байнгын хороо  Авлигатай тэмцэх газрын даргаар томилуулах хүнийхээ нэрийг хурдан оруулж ир гэсэн утгатай албан бичгийг Ерөнхийлөгчийн Тамгын газар хүргүүлсэнтэй зэрэгцэн  хушга хочит  Н.Ганболд эрхэм АТГ-т ирэхээр болсон талаар дахин яригдах боллоо. Авлигатай тэмцэх газрын дарга нарт холбогдох хэрэг шүүхийн шатанд эцэслэн шийдвэрлэгдсэн учраас Хууль зүйн байнгын хорооноос дээрх агуулга бүхий албан бичгийг хүргүүлсэн талаар УИХ-ын Тамгын газрын Ерөнхий нарийн бичгийн дарга Ц.Шаравдорж хэлсэн.  Тэрбээр бүхэл бүтэн нэг албан байгууллага эзэнгүй байгаад байна.  Тиймээс Ерөнхийлөгч болон Ерөнхийлөгчийн Тамгын газар энэ асуудалд анхаарал хандуулж ойрын үед шийдвэрлэх байх гэж найдаж байгаагаа илэрхийлсэн юм. Харин энэ найдвар биеллээ олох цаг ойртон ирж, бүхэл бүтэн нэг байгууллага даргатай болох гэж байгаа аж. Ч.Сангарагчаа, Д.Сундуйсүрэн нарын бүрэн эрхийг хэн ч түдгэлзүүлээгүй ч, тэд тэнсэн харгалзах ял сонссон учраас албан тушаалдаа эргэн ирж очихын тухай ямар ч яриа байхгүй.  Угаас анхан шатны шүүхээс ял сонсон ачигдсаных нь дараачаас АТГ-ын даргад нэр дэвшигчдийн нэрс яригдаж ирсэн. Тухайлбал, Ерөнхийлөгчийн хуулийн бодлогын зөвлөхөөр ажиллаж байгаад Улсын ерөнхий прокурорын туслах газрын даргаар томилогдсон Г.Ганзориг, ТЕГ-ын дарга асан Т.Билэгт, Прокурорын дэргэдэх мөрдөн байцаах албаны дарга Б.Галдаа, УИХ-ын гишүүн асан Б.Дэлгэрмаа, ЗГХЭГ-ын дарга асан Т.Лхагваа нарын эрхмүүдийн нэрс яригдаж ирсэн. Харин одоо томилогдох болсон гэгдэж буй  Консул Н.Ганболдын тухайд харьцангуй сүүлд нэр нь орж ирсэн. Тэгэхдээ Н.Ганболд болоод  Монголын өмгөөлөгчдийн холбооны дэд ерөнхийлөгч Ж.Энхнасан нарт АТГ-ын удирдлагуудын албан тушаалыг санал болгосон ч, тэд татгалзсан талаар мэдээлэгдэж байсан юм. Гол нь хуулинд заасанчлан 55 нас хүрсэн эрхэм энэ албан тушаалд суух ёстой. Тэр шаардлагыг Н.Ганболд хангаж буй. Ерөнхийдөө бол АТГ-ын даргын суудлыг “авлага”-тай суудал гээд зүрхшээх хандлага хэдийнэ бий болчихсон. Насаараа шүүхийн байгууллагад хүчин зүтгэсэн шударга хуульч гэгдэж явсан Б.Дангаасүрэн эрхэм эл газрын анхны даргаар ирээд учир битүүлгээр хорвоог орхисон. Харин хоёр дахь дарга Ч.Сангарагчааг шүүх гэм буруутай гэж үзсэнийг олон нийт мэдэж буй. Тэгэхээр удирдсан даргадаа ээлгүй энэ газрыг удирдахын төлөө эрхбиш улайрсан өрсөлдөөн ил харагдахгүй байгаа юм. Гэхдээ тэмцэл далд хэрхэн өрнөж буй нь хөшигний наанаас харагдахгүй байгаа ч юм бил үү!