Монгол Улсын Засгийн газрын хэрэгжүүлэгч агентлаг, Нийгмийн халамж үйлчилгээний ерөнхий газраас “Олон улсын гэр бүлийн өдөр”-ийг угтсан арга хэмжээг олон нийтийн оролцоонд тулгуурлан зохион байгуулах үүргийг дүүрэг, орон нутгийн удирдлагад өгсөн байна. Уг ажлын хүрээнд нийслэлийн Баянзүрх дүүргийн Улаан загалмайн хороо, НХҮХ “Эмэгтэйчүүд хөгжлийн тэмүүлэл” сантай хамтран ерөнхий боловсролын сургууль, цэцэрлэгүүдийн дунд “Гэр бүлийн үнэ цэнэ” хэлэлцүүлгийг зохион байгуулахаар болжээ. Ирэх ням гарагт "Сүнжин гранд" зочид буудалд уг хэлэлцүүлэгт Баянзүрх дүүргийн ерөнхий боловсролын сургууль, цэцэрлэгийн, хүүхдүүд, эцэг эхийн төлөөлөл оролцох юм байна Тус хэлэлцүүлгийг зохион байгуулсанаар гэр бүлийн цөм нь хүүхэд, тиймээс хүүхдээр дамжуулан гэр бүлийн өнөөгийн нөхцөл байдлыг бодитойгоор үнэлж болно. Түүнчлэн Олон улсын гэр бүлийн өдрөөр зохион байгуулж байгаа ажил нь үндэсний хэмжээний чуулганд оруулах санамж, уриалга гаргах нөхцөл боломжийг би болгож байгаагаараа давуу талтай хэмээн уг ажлыг зохион байгуулагчид дүгнэж байгаа юм.

 Д.Цэцэг