Замын цагдаагийн газрын зүүн талд байрлах “Траст трейд” хиамны үйлдвэрт өнгөрөгч баасан гаригт дэлбэрэлт болсон талаар бид өмнө мэдээлсэн билээ. Тодруулбал, Нийслэлийн Баянзүрх дүүргийн VI хороо, 13 дугаар хорооллын “Шинэ дөл” цогцолборын дэргэд байрлах “Траст трейд” хиамны үйлдвэрийн махны агуулахад 14.30 цагийн орчимд дэлбэрэлт болж,  дэлбэрэлтийн улмаас хоёр хүн шархдсан. Гал унтраах ангийнхан дуудлага өгснөөс арваад минутын дараа ирж галыг унтраасан юм. Албан бус эх сурвалжийн мэдээлснээр тухайн үед байсан гагнуурчин хамгаалагч хоёр дэлбэрэлтэд өртсөн талаар мэдэгдэж байсан. Тэднийг Түлэнхийн төв эмнэлэгт шилжүүлсэн бол Онцгой байдлын албан хаагчид гарсан галыг цаг алдалгүй унтраах ажлыг хийсэн юм. “Траст трейд”-ын хиамны цехийн махны агуулахад гарсан дэлбэрэлт, галын шалтгаан хуулийн дагуу 14 хоногийн дараа тодорно. Гэвч тухайн үед дэлбэрэлтийн улмаас шидэгдсэн хайлшнууд “Шинэ дөл” хотхоны байшинг давж, ойр орчимд байсан хэд хэдэн автомашины шилийг хагалсан байсан. Магадгүй илүү хүчтэй дэлбэрэлт болсон бол хаяа дэрлэн байрлах орон сууцны хотхон, шинээр баригдаж буй орон сууцнууд, иргэдийн амь нас эрүүл мэнд гээд багагүй хохирол учирч болзошгүй байсан нь нууц биш. Ер нь нийслэл хотод энэ мэт тэсрэх, дэлбэрэх бодис ашигладаг үйлдвэр аж ахуйн нэгж,  шатахуун түгээгүүрүүд орон сууц, гэр хороололын дунд хамгийн зохимжгүй газраа байршдаг. Тиймдээ ч тэсрэх бодисон дээр суусан нийслэлчүүд гэх яриа ч бий. Галын дүгнэлт гарч, дэлбэрэлтийн шалтгаан тодрох нь мэдээж. Харин шатах тослох материал, газ, шатахуун ашигладаг байгууллагууд  аюулгүй ажиллагаандаа анхаарлаа хандуулж, дотоод хяналтаас сайжруулахыг энэ удаагийн хэрэг санууллаа.   П.Наран Гэрэл зургийг Б.Мөнх-Эрдэнэ