УИХ-ын гишүүн С.Ганбаатар, Ерөнхий сайдын зөвлөх Д.Кёкүшюзан Батбаяр нар өчигдөр  Эх хүүхдийн эрүүл мэндийн үндэсний төвд гэнэтийн шалгалт хийсэн юм. Энэхүү шалгалтыг УИХ дахь бие даагч гишүүд болон Засгийн газрын “1111″ төвд хүүхдийн эмнэлгүүдийн асуудлаар эцэг эхчүүдээс ирсэн санал гомдолын дагуу тус эмнэлгээс эхлүүлсэн. “11 11” төв ажиллаж эхлэсэн цагаас өнгөрсөн долоон сарын хугацаанд 40 мянга гаруй иргэн санал хүсэлт ирүүлсний 2000 гаруй нь эрүүл мэндийн салбартай холбоотой байдаг аж. Эдгээрийн нэг нь Говь-Алтай аймгийн иргэн Р.Даваадоржийн 1111 төвд ирүүлсэн гомдлын дагуу ЭХЭМҮТ-д очсон аж. Учир нь Р.Даваадоржийн вакцин хийлгэсэн охин нь сувилагчийн буруугаас хүнд халдвар авч, охиноо эмчлүүлэх гэж аймгийн эмнэлэг, Эрүүл мэндийн яам гэхчлэн олон шат дамжлагаар явсан ч үр дүнд хүрээгүй гэнэ. Тиймээс 11 11 төвд хандсанаар Эх хүүхдийн эрүүл мэндийн үндэсний төвд хэвтэн 14 хоногийн өмнө хагалгаа хийлгэсэн аж. Хагалгаа амжилттай болсон бөгөөд Д.Хонгорзул охин эмнэлгээс гарч байгаа гэлээ. Үүний дараа тус эмнэлгээр үйлчлүүлж байгаа болон хэвтэн эмчлүүлж буй иргэдтэй уулзах, эмнэлгийн удирдлагууд санал сэтгэгдлийг сонсон, ямар асуудал тулгарч байгаа талаар ярилцсан. Энэ үеэр мөн Сонгинохайрхан дүүргийн хүүхдийн эмчинй буруугаас өнгөрсөн оны есдүгээр сард хатгаа нь хүндэрсэн хүүхдийг буруу эмчилсэн гэх хүүг аав ээжийнх хүсэлтээр хэвтэж буй тасагт нь очиж харсан. Хоёр ой ч хүрээгүй бяцхан хүүгийн тархи, хоёр бөөр нь усжсан, сэхээний тасагт хэвтэж байгаад мэдрэлийн тасагт шилжсэн гэнэ. Анх эмнэлгээр явснаас хойш ЭХЭМҮТ-д гурав дахь удаагаа хэвтэж байгаа ба эмнэлгийн ор хоногийн тоо дууссан тул өнөөдрөөс гарах гэнэ. Харин хүүгийн эцэг эх эмнэлгээс гаргах гэж байгаад  дургүйцлээ илэрхийлсэн. Учир нь эрүүл мэндийн байгууллагуудын хариуцлагагүй үйлдлээс болж миний эрүүл саруул хүүхэд одоо ийм байдалтай хэвтэж байна. СХД-ийн хүүхдийн эмнэлэгт эмчилж байсан эмч бидэнд “хүүхэд чинь эрүүл болохгүй. Залуу улс дахиад хүүхэдтэй болчихгүй юу гэж хэлсэн. Эрүүл саруул төрсөн хүүхэд минь ханиад хүрч, хатгааг нь эмчлүүлэх гэж бид эмнэлэгт хандсан. Гэтэл одоо үхэх сэхэхийн зааг дээр байна. Бид хүүгээ эрүүл саруул болгохыг маш их хүсч байна” гэж байв. Зөвхөн ЭХЭМҮТ гэлтгүй эрүүл мэндийн байгууллагуудын бодит байдал ямар байгааг шалгалтынхан асууж, иргэдийн санал гомдолыг хэрхэн шийдвэрлэх боломжтой талаар ярилцсан. УИХ-ын гишүүн С.Ганбаатар “Монгол Улсын эрүүл мэндийн салбарын үйл ажиллагаа бүхэлдээ доголдсон. Энэ бол зөвхөн одоо бий болсон асуудал биш. Өнгөрсөн хугацаанд салбарын яамны удирдлагуудын хийсэн буруу тогтолцооны гажуудал энэ бүхний гол буруутан. Тэд салбараа хөгжүүлье гэж хичээгээгүй нь Төрийн нарийн байсан хүний нууц сейфэнд  хагас тэрбум гаруй төгрөгийн гадаад валют олдсоноор харж болно. Яамны нэр бүхий удирдлагуудын найман тэрбумын хэргээр АТГ-д шалгагдаж байгаа нь энэ бүхнийг батална. Түүнчлэн салбарын яамны бодлогод эмч эмнэлгийн ажилтан, эмчлүүлэгч буюу иргэд оролцож өөрсөддөө хэрэгтэй байгаа өөрчлөлт, шинэчлэлт, тоног төхөөрөмжийн хангалт зэрэг шийдвэр гаргахад санал бодлыг нь тусгаж байгаагүй. Хэн нэгнээс буруу эрж буруутгах гэхээсээ илүү үүнээс цаас иргэдийн эрүүл мэндийн даатгалыг хэрхэн үр бүтээлтэй ашиглахав. ЭМД-ийн хуримтлалаар эмчлүүлэгчийн эмчилгээний зардал, монгол улсад шаардлагатай байгаа тоног төхөөрөмжийг худалдан авахад хэрхэн зөв зарцуулах вэ гэдэгт анхаарлаа хандуулах цаг болсон” гэлээ. Ерөнхий сайдын зөвлөх Д.Кёкүшюзан Батбаяр хэлэхдээ “Шинэчлэлийн Загийн газрын 1111 төвд хандсан иргэдийн гомдлын дагуу бид ажиллаж байгаа. Өнгөрсөн хугацаанд Монгол Улсын ерөнхий сайд Н.Алтанхуяг эрүүл мэндийн салбарт нэг сар гаруй ажилласан. Үүний үр дүн ч гарч байгаа. Бид иргэддээ эмнэлгийн үйлчилгээг чанартай сайн үзүүлдэг, орчин үеийн эмнэлгүүдтэй болох зорилготой. Үүний тулд асуудлыг дор дор нь шийдэх, харилцан уялдаа холбоотой ажиллах үүднээс иргэдийн санал гомдлын дагуу энэ эмнэлэгт ирсэн. ЭХЭМҮТ муу эмнэлэг гэж ирээгүй. Энэ эмнэлэгт эмчлүүлж байгаа хүхдүүдийн эцэг эх өмнө нь эмчлүүлж байгаад 1111 төв хандсан тул бид энд шилжүүлсэн байсан. Хойшид ч иргэдийн санал гомдлын дагуу шуурхай арга хэмжээ авч ажиллана” гэв. Хамгийн сүүлд тус эмнэлгийн даргын үүрэг гүйцэтгэгчээр ажиллаж байгаа Ш.Энхтөр “ Шинэчлэлийн Засгийн газрын ажлын үр дүн бидэнд ч мэдрэгдэж эхэлсэн. Тухайлбал, манай ЭХЭМҮТ-ийн дэргэд баригдаж буй өргөтгөлийн барилгад зүрхний эмчилгээний тасаг нээгдэх юм. Зүрхний өвчтэй хүүхдүүд өнөөдрийг хүртэл гадаадад эмчлүүлж байсан. Манай улсад зүрхний хагалгаанд орох шаардлагатай 900 гаруй хүүхэд байна. Энэ хүүхдүүд ирэх намраас эх орондоо эмчлүүлэх бололцоотой болно. Үүнд шаардагдах 2,5 тэрбум төгрөгийг Ерөнхий сайдын төсвийн багцаас гаргахаар болжээ. Мөн бөөрний тасаг нээсэн, энд хиймэл бөөрний гурван аппарат ажиллаж байна” гэж хэлсэн. Ийнхүү шалгалтынхан тус эмнэлгийн Хүүхдийн мэс заслын клинкийн хаалгаар гарах үед 17 настай хүү нь ослын улмаас хөлийн хуруу, гарын шуугаа тайруулсан, одоо бөөрний архаг дутагдалтай болсон. Одоо би хүүгээ яах вэ хэмээн Ерөнхий сайдын зөвлөх Д.Кёкүшюзан Батбаяр, ЭХЭМҮТ-ийн даргын үүрэг гүйцэтгэгч Ш.Энхтөр нарт хандсан. Харин түүний хүүгийн эмчилгээг өөрийн эмнэлэгт хариуцан хийхээ Ш.Энхтөр дарга энэ үеэр амалсан юм. . П.Нарандэлгэр