Хамгийн сүүлд МАХН Ерөнхийлөгчид нэр дэвшигчээ тодруулснаар төрийн тэргүүний төлөөх сунгаа эхлэхэд бэлэн боллоо.

Эхнээсээ тодорхой байсан Ц.Элбэгдорж нэр дэвшигчээс бусад нь олон таавар таамаглалыг мухарлан гарч ирлээ. Б.Бат-Эрдэнэ аваргын хувьд намаасаа чансаа зааж гарч ирлээ. Гэхдээ ард түмэндээ зэмлэл, донго сайн хүртэж олон жилийн авлига коррупцид толгой нь даагдахгүй болтлоо данхайсан МАН-ын хувьд Б.Бат-Эрдэнэ аварга биш бол өөр хэн гэж. Тиймдээ ч нам нь Б.Бат-Эрдэнийг гаргаж ирлээ. Үүнийг түүний нэр дэвшигчээр тодорсноос хойшхи өдрүүдийн олон нийтийн санаа бодлоо илэрхийлж байгаа байдлаас харж болохоор байна.

.

МАХН-ын хувьд нэлээн сонин л сонголт хийгдлээ. Энэ намын нэр дэвшүүлэлтээс олон нийт энэ нам сонгуульд хэний талд зогсох вэ гэдгийг л ойлгох гэсэн хүлээлт байсан. Гуравдагч хүчин үүний хариуд нэлээн битүү сунгаа хийж гуравдагч хүчний орон зайгаа хадгаллаа гэж даруухнаар тайлбар хийв. МАН саяхан нэг шүүрэх гээд орхисон анхны эмэгтэй нэр дэвшигч гэсэн чимгийг зүүж өгөөд Н.Удвалыг зүтгэ гэжээ.

.

Ямартай ч намын дарга Н.Энхбаяраа дагаад нийгэмд танигдсан уу гэвэл танигдсан. Улс төрийн тогоонд овоо хэдэн жил буцалсан, эрчүүд ширүүн дуугарахад зүгээр нэг доголон нулимстай гараад гүйчих хүн биш гэдгээ харуулсан л эмэгтэй. Н.Удвал гэдэг нэр дэвшигчид эмэгтэй хүн талаас нь хүндэтгэлтэй хандаж гуравдагч хүчний талаас нь энэ сонгуульд дэмжих хүн цөөнгүй байгаа. Гэхдээ түүнд энэ сонгуульд амжилт гаргахад нь нэлээн дөнгө болж хормойдох зүйл нь одоогийн Эрүүл мэндийн сайдын суудал нь. Элгээрээ хэвтсэн өндийж өгдөггүй энэ салбарыг тойрсон хэл ам шүүмжлэл бүхэн Н.Удвал нэр дэвшигчийн хасах оноо болж бөөгнөрөх болно. Энэ нэр дэвшигчээр   МАХН өнгөрсөн УИХ-ын сонгуулиар базсан оноогоо хэр хадгалж, өнгөрсөн хугацаанд сонгогчдынхоо итгэлийг дааж амласан шударга ёсыг тогтоохын төлөө сайн ажилласан уу, өндөр албан тушаалд мансуурч улс төрийн наймааны нэг тал  болсон уу, үгүй юу  гэдгээ харуулж ард түмнээр дүнгээ тавиулна. Ямартай ч анх удаа эмэгтэй хүн нэр дэвшиж манай улсын жендэрийн үнэлэмж лав нэгээр дээшиллээ.

.

Харин нөгөө талд нь хийсэн бүтээсэн болон өнгөрсөн амлалтынхаа  биелэлт зэрэгт дүнгээ тавиулж, үйл ажлынхаа үргэлжлэл болох мөрийн хөтөлбөрөө барьж өндөр оноо цуглуулж чадах одоогийн Ерөнхийлөгч Ц.Элбэгдорж, том намын шийдмэг тактик, өөрийн түвшин тогтуун имижээр гараад ирж чадах Б.Бат-Эрдэнэ гэсэн хоёр нөхөр Н.Удвалын зүг нүд ирмэн намайгаа дэмжинэ биз дээ, нэрээ татах юм уу гэж ханд хаях л байх. Бүсгүй хүнийг дор үзэх Кунзийн хатуу угшилтай Солонгост эмэгтэй хүн Ерөнхийлөгч болж чадаж байхад цэцэн Мандухай хатны бахархалтай Монголын ард түмэн Н.Удвал нэр дэвшигчийг ялуулчихдаггүй юмаа гэхэд  хүндлэл урмыг харамгүй өгөх биз ээ.  Жудагтай шударга өрсөлдөөн болоосой л гэж хүмүүс ярьж байна.

Гурван нэр дэвшигч, Ерөнхийлөгч болох гэсэн 3 хүсэл. Харин боломж нэгд нь л бий.

.

П.Баярхүү