УДЭТ-ын найруулагч, Урлагийн гавьяат зүтгэлтэн Б.Баатарын хөлний бэртэл хүндэрч, яаралтай гадаадад эмчлэх шаардлагатай болсон тул театрынх нь хамт олны зүгээс эмчилгээний зардалд хандив өргөхөөр хүндэтгэлийн тоглолт зохион байгуулахаар болсон. Тэгвэл тоглолт өнөөдөр 19.00 цагаас "УБ Палас"-ын концертын их танхимд болох юм байна. Найруулагч Б.Баатар 1985 онд найруулагч Б.Мөнхдоржтай хамтран "Гургалдайн дуут шөнө" жүжгээ тайзнаа амилуулсан бөгөөд тэр жилдээ найруулагч Г.Доржсамбуутай хамтран "Гарваа" жүжгийг, бие даан "Хүн бүгд би" жүжгийг тус тус тайзнаа тавьжээ. "Харанхуйд харагдахгүй", "Далан худалч", "Кармен хүүхэн", "Ганцхан алхахад уулзана", "Садар эрийг номхтгосон нь", "Цахлай", "Хүйтэн сэнтий", "Гавал сар", "Амьгүй албат", "Ээжээ", "Ану хатан" зэрэг 20 гаруй уран бүтээлийг тайзнаа амилуулж, театрын урын санг баяжуулахад үнэтэй хувь нэмэр оруулсан уран бүтээлч билээ. Б.Аянга