Шударга өрсөлдөөн, хэрэглэгчийн төлөө газарт ломбардаар үйлчлүүлээд хохирлоо гэсэн гомдол их ирдэг байна. Уг гомдлуудыг шийдвэрлэх явцад барьцаалан зээлдэх журмаар зээл олгох үйл ажиллагаа эрхлэгчдийн үйл ажиллагааг хянаж зохицуулж байдаг хууль байдаггүй нь иргэдийг хохироох үндсэн нөхцөл байдал болдог нь тогтоогджээ. Тиймээс Шударга өрсөлдөөн, хэрэглэгчийн төлөө газраас “Барьцаалан зээлдэх журмаар зээл олгох үйл ажиллагааны тухай” хуулийн төслийн эхийг бэлэн болгож УИХ-ын гишүүн Г.Уянга өргөн барихаар болжээ. Уг хуулийн төсөлд өөрийн үйл ажиллагааны талаар буруу ташаа зар сурталчилгаа хийх, мэдээлэл өгөх, үл хөдлөх хөрөнгө барьцаалах, иргэний бүх төрлийн баримт бичиг, хуулийн этгээдийн үүсгэн байгуулахтай холбоотой баримт бичиг барьцаалах, насанд хүрээгүй хүнд зээл өгөх, барьцааны хөрөнгөнөөс шалтгаалан зээлийн хүүг ялгамжтай тогтоох, шөнийн цагаар ажиллахыг хориглосон зүйл заалтуудыг оруулж өгч байгаа юм байна. Д.Цэцэг