6000 тонн “Монгол 93” шатахуун орж иржээ

Монгол-Хятадын Засгийн газар хоорондын хуралдаанаар Хятадад экспортолж буй газрын тосыг боловсруулж байгаа Хөх хотын үйлдвэрээс газрын тосны бүтээгдэхүүн авах санал тавьсан. Энэхүү яриа хэлэлцээрийн үр дүнд Хятадын “CNPC” компанийн харьяа Хөх хотын боловсруулах үйлдвэрээс сард 10 мянга хүртэл тонн бүтээгдэхүүн авах гэрээг өнгөрсөн дөрөвдүгээр сард байгуулсан юм.  Монгол Улсаас экспортлон гаргасан газрын тос “Монгол 93” нэртэй шатахуун болон эх орондоо ирж буй нь энэ юм. “Монгол 93” шатахууныг “НИК”, “Шунхлай”, “Магнай трейд” компаниудын ШТС-уудаар өнөөдрөөс эхлэн борлуулахаар боллоо. Энэхүү шатахууны литр тутамыг 1670 төгрөг буюу АИ92 шатахуунтай адил үнээр худалдахаар болжээ. Одоогийн байдлаар нийтдээ 6000 тонн “Монгол 93” шатахууныг БНХАУ-аас оруулж ирсэн байна. “Монгол 93” шатахууны нээлтийн арга хэмжээ өнөөдөр Зүүн дөрвөн зам дахь Петровисын ШТС-д боллоо. Нээлтэд Ерөнхий сайд Н.Алтанхуяг, Уул уурхайн сайд Д.Ганхуяг, УИХ-ын гишүүн Ч.Улаан, Засгийн газрын хэрэг эрхлэх газрын дарга Ч.Сайханбилэг, Газрын тосны газрын дарга Г.Өлзийбүрэн зэрэг албаны хүмүүс оролцлоо.

.

Энэ үеэр Уул уурхайн сайд Д.Ганхуяг үг хэлж, Ерөнхий сайд Н.Алтанхуягт “Монгол 93” шатахууны дээжийг гардуулж, АИ92 шатахуунаа хэрэглэдэг явдаг хоёр автомашины банкийг дүүргэлээ.

Ерөнхий сайд Н.Алтанхуяг энэ үеэр “Монгол Улсын анхны Ерөнхийлөгч П.Очирбат 17 жилийн өмнө Дорнод аймгаас гарсан газрын тосоор дээлээ мялааж байсан. Тэгвэл Монгол Улсад олборлосон газрын тосыг Хөх хотын боловсруулах үйлдвэрт боловсруулан өнөөдрөөс эхлэн хэрэглэгчдэд хүргэж эхэллээ. Шатахууны жижиглэнгийн үнэ өнгөрсөн оны сүүлчээр литр тутамд 325 төгрөгөөс доошгүйгээр нэмэгдэх байсан бол 100 төгрөг дээр зогсоож чадсан юм. Энэ бүхэн бидний хамтын хичээл зүтгэл байлаа” хэмээн хэлсэн юм.

.

“Монгол 93” нийслэлийн сарын хэрэглээний 8 хувийг хангана

“Монгол 93” шатахуун

.

- Монголын газрын тосны салбарт өнөөдөр түүхэн үйл явдал болж байна. Сэтгэгдэл ямар байна вэ?

-Сэтгэгдэл өндөр байна. “Монгол 93” шатахуун чанарын хувьд зах зээл дээр одоо борлуулагдаж байгаа шатахуунаас нэг актан өндөртэй. Байгальд ээлтэй гэдгийг юун түрүүнд хэлмээр байна.

.

-Нийслэлийн шатахууны сарын хэрэглээний хэдэн хувийг хангах вэ?

-Эхний ээлжинд оруулж ирсэн “Монгол 93” нийслэлийн автобензиний сарын хэрэглээний 8 хувийг хангана. Харин цаашид “Монгол 93”-ийн зах зээлд эзлэх хэмжээг 40 хувьд хүргэж, нийлүүлэлтийг нэмэгдүүлэх болно. Энэ нь ОХУ нефтийн бүтээгдэхүүнийхээ үнэнд ямар бодлого баримтлахаас шалтгаалаад Монголд эдийн засаг савладаг хараат байдлыг сааруулах нэг боломж. Нөгөөтэйгүүр, Дорнодоос олборлосон нефтийг өмнөд хөршид боловсруулж, хямд үнээр буцаан авахаас гадна ОХУ-ийг олон улсын зах зээл дээрх нефтийн бүтээгдэхүүний жишиг ханшаар бүтээгдэхүүн экспортлох саналыг салбар яамнаас хүргүүлээд байна.

.

- “Монгол 93” шатахуун Сингапурын хөрөнгийн бирж дээр зарагддаг гэсэн үү?

-Тийм. Манай улсад  олборсон газрын тосыг Сингапурын хөрөнгийн бирж дээр “Дачин-33” нэрээр үнэлэгддэг. Энэ шатахуун евро-2 стандарт болох дотоод шаталтат хөдөлгүүрийн түлш буюу автобензин.

.

-Бусад шатахуунаас ямар онцлогтой вэ?

-Нэгдүгээрт эх орны маань хөрсөөр гарсан бүтээгдэхүүн. Хоёрдугаарт, давирхайн агууламж MN 217:2006 стандараас бага хэмжээтэй. Мөн октан  тоо нь стандарт үзүүлэлтээс 1,5 нэгжээр илүү учир дутуу шаталтаас хорт хийг ялгаруулахгүй сайн талтай.

 .

Б.Одон