Урин дулаан цаг ирж гамшигийн хэмжээнд яригдах болсон утаа цаашиллаа хэмээн арай гэж тайвширч суусан нийслэлийн иргэд зун болохоор бас нэгэн айдаст автдаг болсон. Юу ингэж иргэдийг айлгаж байна вэ гэвэл барилгууд. Хэдийгээр хаа сайгүй бүтээн байгуулалт өрнөж байгаа нь сайшаалтай ч нийслэлийн иргэдэд амьд явах баталгаа алга болоод байна.

.

Ингэж хэлэх болсны учир нь өчигдөр 18.00 цагийн орчимд Төв шуудангийн ойролцоо “Эко констракшн”-ы барьж байгаа барилга дээрээс тулгуур төмөр  болон хавтангууд унасан хэрэг гарлаа. Ингэж унахдаа төв замаар уулзвар нэвтрэхээр хүлээж зогссон “Хера Холдинг” компанийн “Тусгай үйлчилгээ ” гэсэн бичигтэй автобусны дээврийг нэвт сүвлэн зоогджээ. Мөн хэд хэдэн жижиг тэргийг ч цохисон байна. Барилгын яг доор явган хүний зам бий. Энэ хэсэгт хөл хөдөлгөөн ихтэй, дээрээс нь яг энэ цаг мөчид ажил, сургууль тарж байсан болохоор хүн ч ихтэй байсан.

.

Гэтэл тус барилгын ажилчид бөөнөөрөө гарч ирээд автобусанд зоогдсон төмрийг аваад зугтаж байгаа дүрс бичлэгт үлдсэн байна. Эгээ л баяр бахдал болсон янзтай хөөрөн гүйлдэх тэд хүн бэртээсэн бол төмрөө аваад ийн зугтах байсан юм байх даа. Энэ үед барилга дээрээс 7-8 төмөр унажээа. Жолоочийн хэлснээр автобусанд сууж явсан нэг залуугийн яг хажууд уг төмөр туссан гэж байгаа. Азаар хүний амь үрэгдсэнгүй.

.

Ажилчдын автобус байсан тулдаа заал нь зорчигч цөөнтэй, сэлүүхэн байсан юм билээ. Харин уг автобусны цаад талд “Зүүн салаа-23” явж байсан. Байнга зорчигч ихтэй явдаг энэ чиглэлийн автобусанд уг төмрүүд туссан бол яах байсан юм бол бүү мэд. Бодоход ч аймаар.

.

Өнгөрсөн оны есдүгээр сарын 17-ны өдөр “Тэнгис” кинотеатрын хажуугийн барилгаас барилгын тулаас төмөр унаж, 20 настай залуу амиа алдсан харамсалтай хэрэг гарч байсан. Уг барилга нь мөн л “Эко констракшн”-ы барилга байсан. Тэр үед мөн л ажилчид нь хэвлэл мэдээллийнхийг ойртуулахгүй хаалга үүдээ тас цоожилж, өөрсдөө ар өврийнхөө хаалгаар гарч зугтаж байсан нь саяхан санагдаж байна.

.

Барилгын чанараараа байнга хэл ам дагуулдаг энэ байгуулага хөдөлмөрийн аюулгүй ажиллагаа ч хангаж чаддаггүйгээс иргэдийг ийнхүү айдаст автуулсаар байна. Яг хотынхоо төвд зам дагуу барилга барьж байгаа барилгын компаниудын тэр дундаа “Эко констракшн аюулгүй ажиллагаа хангаагүйгээс ийнхүү дахин хүний амь эрсдэх дөхлөө. “Эко”-гийн С.Нямдаваа гэгч нь хаана байрлал сайтай газар байна тэрийг албан тушаалтнуудад хахууль өгч байж гартаа оруулаад сурсан нэгэн. Иргэдийн амь насанд заналхийлж, “алан хядах ажиллагаа” явуулж буй хэнд ч дийлддэггүй “Эко констракшн”-ыханы толгойг энэ удаа дахиад л илээд өнгөрөх үү Хотын дарга аа.

ВИДЕО

.

Д.Цэцэг