Саяхан Богд уулын Богины аманд өндөр настнуудын тарьсан 150 орчим модыг хугалж, сугалж устгасан хэрэг гарсан. Богины аманд өнгөрсөн жил 100, өнөө жил 100 мод тарьсныг нэг шөнийн дотор "Би энэ газрын эзэн" гэж өөрийгөө нэрлэсэн хүмүүс устгасан байгаа юм. Энэ тухай мод тарьсан хүмүүс нь олон нийтэд мэдээлж арга хэмжээ авахыг хүсч, хэвлэлийн хурал хийж байсан билээ. Тэгвэл тэднийг хэвлэлийн хурал хийсны маргааш “газрын эзэн” нь гэх залуу ирээд Богины амыг тойруулан хашаа босгожээ. Энэ талаар УИХ-ын гишүүн асан, АН-ын ахмад гишүүн Д.Хувьтөгөлдөрөөс тодрууллаа. . -Танай мод тарьсан газар юу ч үгүй болтолоо сүйрсэн гэж сонслоо. Энэ үнэн юм уу? -Үнэн. Биднийг хэвлэлийн хурал хийсний шөнө аялал жуулчлалын статустай компани Богины амыг тойруулан хашаа босгож, бидний тарьсан модыг газартай тэгшилсэн. Тэр бүү хэл, хөрсийг нь тэгшилж, барилга барих суурь цутгахад бэлэн болгосон байсан. Одоо биднийг тэр газарт хамгаалагчид нь огт ойртуулахгүй байгаа. Тиймээс бид Хан-Уул дүүргийн цагдаагийн хэлтэст гомдол гаргасан. Тэрний дагуу Улсын ерөнхий прокурорынхон энэ хэрэгтэй танилцаж эрүүгийн хэрэг үүсгэхээр болсон. Ингэхдээ Эрүүгийн хуулийн 153 дугаар зүйлд заасан бусдын эд хөрөнгийг сүйтгэсэн, 211 дүгээр зүйлд заасан ойн тухай заалтыг зөрчсөн гэдэг зүйлчлэлээр шалгахаар болж байгаа. . -Яг ямар компани тэр газарт барилга барих гэж зүтгээд байгаа юм бэ. Газрын зөвшөөрөлтэй эсэхийг нь мэдсэн үү? -Компанийн нэрийг нь мэдэхгүй. Р.Бурмаа гишүүний дүү Бадрал гэж залуу бидний модыг сүйтгэж, барилга барих гээд байгаа. Уг нь энэ компани аялал жуулчлалын статустай юм билээ. Бадралын хувьд МАН-ын гишүүн. . - УИХ-ын гишүүн Р.Бурмаа чинь АН-ын гишүүн шүү дээ. Та бүхэнтэй холбоо барьсан уу? -Холбоо бариагүй. С.Оюун гишүүн энэ асуудлаас болж Р.Бурмаатай маргалдсан сураг дуулдсан. Хууль хяналтын байгууллага уг хэрэгт анхаарлаа хандуулна гэдэгт итгэж байна. Уг нь бид АН-ын алтан хараацайнууддаа зориулж тэдгээр модыг тарьсан юм шүү дээ. . Б.Одон