Аманд орсон үнэ хэлдэг вьетнам засварын газруудыг цэгцэлж, тогтсон үнэ тарифтай болгоно гэж ШӨХТГ-аас зарлаж байсан нь саяхан. Энэ нь вьетнам засварчдын хэлсэн үнээр нь автомашинаа засуулдаг бидэнд үнэхээр сайхан сонстож байсан. Гэтэл өнөөдөр энэ асуудал бахь байдгаараа, нөгөө вьетнам засварчид амандаа орсон үнийг хэлж зогссоор байна. Тариф тогтоох биш тархи татаад авах үнэ хэлэх вьетнам засварын газрууд байсаар.

Энэ амралтын өдөр хуучин дөрөвдүгээр дэлгүүрийн ард байрлах вьетнам засварын газрыг зорилоо. Энд үйлчилгээний үнийн тариф гэх зүйл харагдсангүй. Засварын газрын ажилтнаас “Үйлчилгээний үнийн тарифыг чинь харъя” гэвэл монголоор муугүй ярьдаг вьетнам эр “Уучлаарай. Бид жолоочтойгоо тохиролцоод засвар үйлчилгээгээ хийдэг. Зарим жолооч засвар үйлчилгээгээ хийлгэчихээд төлбөр дээрээ унждаг. Тиймээс үнэ өртөг дээрээ ярилцаж, тухайн хүний амьжиргаанд тааруулан үйлчилж байна. Энэ нь ч хэн хэндээ амар. Хэрэв та машиндаа засвар хийлгэх гэж байгаа бол машинаа унаад хүрээд ир. Би танд 300-320 мянган төгрөгийн хооронд хийгээд, хоёр хоногийн дотор гаргаад өгч болно. Үүнээс бага үнээр хийлгэнэ гэвэл бид амжихгүй. Манайхаар үйлчилгээ хийлгэх дөрвөн ч машин захиалгаа өгөөд хүлээж байна. Өөрөө л мэд дээ” гэв. Дээрх авто засвараас холгүй орших өөр нэг вьетнам засвараас үнийн тариф нь бас л ил харагдаагүй учир байгаа эсэхийг нь лавлалаа. Харин тэд урдаас “Машинаа аваад ир. Харж байж үнэ хэлнэ” гээд халгаасангүй.

Энэ талаар ШӨХТГ-ын албаны эх сурвалжаас тодруулахад “Би өөрсдөөсөө шалтгаалах ажлыг өнгөрсөн арваннэгдүгээр сард хийсэн. Ойрын үед энэ асуудлаар иргэдээс албан ёсны гомдол ирүүлээгүй учир вьетнам авто засварын газруудад шалгалт хийгээгүй. Албан ёсны гомдол ирвэл шалгалт хийж болно” гэлээ.

Б.Одон