Монгол Улсын Ерөнхийлөгчийн сонгуульд өрсөлдөхөөр АН, МАН, МАХН-аас нэр дэвшигчид Сонгуулийн ерөнхий хороонд бүртгүүлээд байгаа билээ. Нэр дэвшигчид маргааш СЕХ-ноос нэр дэвшигчийн үнэмлэхээ гардан авснаар сонгуулийнхаа сурталчилгааг албан ёсоор эхэлнэ.

.

Ардчилсан намаас нэр дэвшигч, одоогийн Ерөнхийлөгч Ц.Элбэгдорж сонгуулийнхаа сурталчилгааг Сүхбаатар аймгаас эхлэх болсон байна. Ерөнхийлөгчийн хувьд  жанжин Д.Сүхбаатарын нэрээр нэрлэгдсэн энэ аймгийг наран мандах зүг хэмээн билэгшээн сонгосон бололтой.  Ц.Элбэгдоржийн сонгуулийн штабыг намын дарга Н.Алтанхуяг удирдахаар болсон байна. Харин түүний сурталчилгааг Ерөнхийлөгчийн Олон нийтийн харилцаа, нийтлэг бодлогын зөвлөх А.Ганбаатар, намын Ерөнхий нарын бичгийн дарга Ц.Оюундарь нар хийх юм.

.

Харин МАН-аас нэр дэвшигч Б.Бат-Эрдэнэ Хэнтий аймгаас сурталчилгаагаа эхлүүлэхээр болжээ. Аваргын хувьд нэгдүгээрт өөрийн төрсөн нутаг, хоёрдугаарт тус аймгаас гурван удаа дараалан УИХ-д сонгогдсон. Уг нь Н.Бат-Эрдэнийг сонгуулийн сурталчилгааныхаа нээлтийг Сүхбаатарын талбай дээр хийхээр төлөвлөж байжээ. Харин талбай дээр арга хэмжээ зохион байгуулахыг зөвшөөрөлийг холбогдох хүмүүс нь өгөөгүй байна. Тиймээс МАН-ын дэмжигч гишүүд нь Соёлын төв өргөөнд нэр дэвшигчийнхээ сурталчилгааг хийхээр төлөвлөж байгаа гэсэн сураг ч байна. Б.Бат-Эрдэнийн сонгуулийн ерөнхий менежерээр намын дарга Ө.Энхтүвшин ажиллана. Харин бусад зүйлийг нь салбар хариуцсан нарийн бичгийн дарга нар буюу нийслэлийг Ц.Мөнх-Оргил, орон нутгийг Ж.Сүхбаатар, нэр дэвшигчийн пиарыг намын Хэвлэл мэдээлэл хариуцсан нарийн бичгийн дарга М.Оюунчимэг нар хариуцана.

.

Тэгвэл МАХН-наас нэр дэвшин өрсөлдөх Эрүүл мэндийн сайд Н.Удвалын хувьд пүрэв гаригт “АСА” циркт Их хуралдайгаа хуралдуулснаар сурталчилгаагаа эхлүүлэх аж. Н.Удвалын сонгуулийн штабыг намын дэд дарга Д.Тэрбишдагва удирдана. Тэгвэл сонгуулийн ерөнхий менежерээр намын Нарийн бичгийн дарга Г.Шийлэгдамба ажиллахаар болжээ. Нийслэлийг нарийн бичгийн дарга Г.Бямбасүрэн, орон нутгийг нарийн бичгийн дарга П.Ангараг хариуцана. Харин сурталчилгааны асуудлыг намын нарийн бичгийн дарга Ц.Чимидсүрэн хийх юм байна.

 .

 Д.Цэцэг