Сэлэнгэ аймгийн Цагдаагийн газрын эрүүгийн тасгийн дарга, цагдаагийн хошууч П.Өлзийсайханыг өнгөрсөн мягмар гараг буюу 21-ний өдөр цагдан хорьжээ. Түүнийг бусдад авлига өгч албан тушаал дэвшсэн, олон удаагийн давтан үйлдлээр албаны эрх мэдлээ хэтрүүлэн ашиглаж, бусдыг айлган сүрдүүлж, хахууль авсан хэрэгт буруутгаж байгаа аж.

 .

Албаны эх сурвалжийн мэдээлснээр прокурорын дэргэдэх мөрдөн байцаах албаныхан иргэдээс ирүүлсэн мэдээллийн дагуу Эрүүгийн тасгийн дарга П.Өлзийсайханыг гурван зүйл ангиар эрүүгийн хэрэг үүсгэн Цагдан хорих 461 дүгээр ангид хорьсон гэнэ.

 .

Эрүүгийн хуулийн 230 дугаар зүйлийн 23.3-т зааснаар “Цагдаа болон олон нийтийн байцаагчийг албан үүргээ гүйцэтгэж байхад нь зодож биед нь хүнд гэмтэл учруулсан”, 181 дүгээр зүйлийн 181.2.2-т зааснаар “Цагдаа болон нийгмийг хамгаалах үүргээ биелүүлж байгаа төрийн албан хаагчийг зодож танхайрсан”, 269 дүгээр зүйлийн 269.2.2-т зааснаар “Бусдад их хэмжээний хээл хахууль өгч албан тушаал дэвшсэн, бусдаас хахууль авсан” гэх гурван зүйл ангиар эрүүгийн хэрэг үүсгэн шалгаж байгаа гэнэ.

 .

Гэрч, хохирогчийг дарамталж буруу мэдүүлэг өгүүлдэг байжээ

Прокурорын дэргэдэх мөрдөн байцаах албанаас хошууч П.Өлзийсайханыг албан тушаалаа урвуулан ашигласан хэргээр өмнө нь таван удаа эрүүгийн хэрэг үүсгэн шалгасан байна. Гэсэн ч гэрч, хохирогчдыг дарамтлаж буруу мэдүүлэг өгүүлэх, танил талдаа авлига өгөх зэргээр аргалаад өнгөрдөг байж. Тэрбээр цагдаагийн байгууллагад ажиллаж эхэлснээсээ хойш дөрвөн удаа шүүхээр орсон байдаг.

Тухайлбал, өнгөрсөн жил АТГ-ын мөрдөн байцаагч Бат-Олзвойтой бүлэглэж, бусдыг зодож, дарамтлан эрүү шүүлт тулгасан гэх хэрэгт холбогдон шалгагджээ. Шүүх хурал нь саяхан болсон ч сурсан зангаараа энэ хэргийг хэрэгсэхгүй болгуулсан байна. Прокурорын байгууллагаас хэргийг хэрэгсэхгүй болгосон шүүхийн тогтоолд эсэргүүцэл бичиж, дээд шатных нь шүүхэд хандаад байгаа гэнэ.

 .

П.Өлзийсайхан гэж хэн бэ?

П.Өлзийсайхан нь цагдаагийн сургууль төгсөж Сэлэнгэ аймагт хуваарилагдсанаасаа хойш тус аймгийн Цагдаагийн хэлтэст 18 жил ажиллаж байгаа юм байна. Түүнийг гавьтай хэрэг илрүүлж үзээгүй ч, Эрүүгийн тасгийн дарга хүртэл дэвшсэнд гайхах хүн олон байдаг гэнэ. Албан тушаалаараа бусдыг айлган сүрдүүлж сурсан түүний эхнэр нь Сэлэнгэ аймгийн төвд 24 цагийн турш архи, согтууруулах ундаа зарж борлуулдаг “Хөхчулуут” гэх хүнсний дэлгүүр ажиллуулдаг юм байна. Сэлэнгэ аймагт П.Өлзийсайхан даргын дэлгүүрийг хааж, зүрхлэх цагдаа, төрийн албан хаагч байдаггүй талаар Сэлэнгэ аймгийн иргэд ам дамжин ярьж байна.

.

Б.Одон