Сэлэнгэ аймгийн Эрүүгийн тасгийн дарга, дэд хурандаа П.Өлзийсайхан нь ШШГЕГ-ын харъяа Цагдан хорих 461-р ангид хоригдоод багагүй хугацаа өнгөрчээ. Түүнийг 72 цаг хорьж саатуулсан нь өчигдөр дуусгавар болсон ч үргэлжлүүлэн 14 хоног хорих прокурорын шийдвэр гарсан байна. П.Өлзийсайханыг хорьсон явдал хэлмэгдүүлэлт болох талаар Сэлэнгэ аймгийн “Шударга ёс” ТББ-ын тэргүүн Л.Цэрмаа, ар гэрийнхэн нь өнөөдөр мэдээлэл хийлээ. Тэд хэлэхдээ “П.Өлзийсайхан маш шударга хүн. Сэлэнгэ аймгийн ард түмэн мэднэ. Тэнд маш олон төрлийн гэмт хэрэг гардаг. Долоон жилийн өмнө маргалдсан хүнийг хүчээр өргөдөл бичүүлж, энэ хүнийг хорьсон. Энэ нь түүнийг хилс хэргээр шоронд суулгаж байгаа гэсэн үг. Өнөөдөр ЦЕГ-аас тус аймгийн цагдаагийн хэлтэст шалгалт хийж байгаа. Энэ шалгалтаар цагдаагийн зарим удирдлагууд болон албан тушаалтын хэргийг илчилж мэднэ хэмээн түүнийг урьдчилсан хорьсон. Найман жилийн өмнө түүнд зодуулсан н.Мөнгөнтулга гэдэг цагдаа одоо эв эрүүл сав саруул ажлаа хийгээд явж байгаа. Бизнесийн бүлэглэл, засаг төрийн удирдлага шударга ажилласан хүнийг хэлмэгдүүлж байна. П.Өлзийсайханыг Сэлэнгийнхэн “Деррик” гэдэг. Ямар нэгэн том хэргийн сэжүүр барьж авсан түүнийг зохион байгуулалттайгаар хорилоо” хэмээн хэлэв. Б.Одон