Монгол Улсын тав дахь Ерөн­хийлөгчийг сонгох сон­гуулийн сурталчилгаа ал­бан ёсоор 6 дахь өдрөө үргэлжилж байна. Улсын хэм­жээнд 40.1 тэрбум төгрөг зарцуулагдаж байгаа сонгууль. Өнгөрөгч өдрүүдэд нэр дэвшигчид ганзага сайтай байлаа гэхэд болохоор байна. Эх орныхоо наран ургах зүгээс сурталчилгаагаа эхлүүлсэн Ц.Элбэгдоржийн уулзалтын тухай мэдээ их сонин содон мессэжтэй байна. Тэрбээр сурталчилгаагаа хийхийн зэрэгцээ Ерөнхий сайдын хийж чадахгүй байгаа зарим ажлыг давхар амжуулж шийдэн өгч байгаа бололтой. Замын-Үүдэд зорчихдоо ачааны машинуудын бөглөрлийг газар дээр нь шийдэж өгсөн гэнэ. Гүйцэтгэх засаглалын ажилд нь ийн шууд хутгалдсанд Ерөнхий сайд маань ямар амбицтай байгаан бүү мэд чимээгүй л байна. Бас нэг гайхалтай мэдээ нь сүхбаатарчууд Ц.Элбэгдорж нэр дэвшигчийг хамгийн өндөр хувиар дэмжих болсон гэнэ. Хамгийн өндөр хувь гэдэг 100 хувиас ихгүй л байх. Ямар ч байсан нөгөө хоёр эндээс саналтгүй л гэсэн мессеж юм болов уу даа.

.

Аварга Б.Бат-Эрдэнэ ч дутах юмгүй. Очсон газар бүр нь л дэмжиж гаргана гэдгээ илэрхийлж байгаа гэсэн. Дорнод аймаг сум бүртээ Аваргыгаа дэмжих хороо байгуулсан гэнэ. Нэр дэвшигч Б.Бат-Эрдэнэ мөн орон нутагт оюутан залуустай уулзан “Оюутан залуу үеэ үүнээс ч илүү дэмжмээр байгаа юм. Жил бүр оюутан залуусыг үнэ төлбөргүй гадаадад боловсрол эзэмшүүлэх бодлогыг дэмжиж явдаг. Оюутанд сар бүр олгож буй 70 мянган төгрөг цаашид үргэлжилнэ. Энэ санал, санаачилгыг УИХ-аар хэлэлцэх үед манай намын бүлэг 100 хувь дэмжсэн” гэж мэдэгдсэн байна.

.

Н.Удвал нэр дэвшигч эртний нийслэл Хархориноос орон нутгийн сурталчилгаагаа эхэлж дараа нь нутгийн зүг жолоо залсан байна. Төрийн тэргүүний сонгуульд нэр дэвшигчийн хувьд төрт ёс, түүх соёлоо дээдэлж, улс үндэснийхээ эв нэгдлийг баталгаажуулахыг бэлэгдэж, ийнхүү Хархориныг сонгосон гэсэн байна. Зүг чигээрээ бол нар буруу гарчихсан юм шиг харагдах хэдий ч нутаг ус нь бороо хуртай билэгтэй сайхан тосож авсан гэнэ. Нутгийн иргэд нэр дэвшигч бор охиноо Бор толгойн баруун энгэрээс угтжээ. Нутгийн ах дүү нар нь нэр дэвшсэн нутгийн охиндоо есөн эрдэнийн есөн цагаан морь, найман шарга морь, идээнийхээ дээжийг өргөн барьж хүндэтгэл үзүүлжээ. Үнэн сэтгэлийн энэ бэлэг нэр дэвшигчийн сэтгэлийг ихэд хөдөлгөсөн төдийгүй тэрбээр баярын нулимс унагаж байлаа гэж тодотгон мэдээлсэн байна. Хөгшчүүл, найз бүсгүйчүүд нь “Хотын та, бидэнд ямар олдох биш, ирсэн дээр чинь жаахан хууч хөөрөөд авъя” гэсэн нь ялагдсанаасаа хойш нутгаараа огт ирээгүй шүү ЧИ гэж сануулж, сэм донгодсон үг болов уу. Нэр дэвшигч Н.Удвал “нутгийн зон олон та нартайгаа уулзахад сайхан байна аа, замд жаахан ядарсан ч та хэдтэйгээ уулзсан чинь сайхан болоод явчихлаа”  хэмээн сэтгэлийн үгээ тэрлэж байлаа гэж нэгэн сайтад мэдээлжээ.

.

Өнгөрөгч амралтын өдрүүдэд гурван нэр дэвшигч гурвуулаа л ганзага сайтай, хэн хэн нь ялчихвал ялчихаар л өнгөтэй явж байгаа тойм байна. Сонгуулийг дагаж төрийн ажил цалгардах бий. УИХ-ын чуулган 10-аад хүнтэй л хуралдаад байна гэдгийг хэвлэлийнхэн анхааруулсан байна.

.

Нэр дэвшигчдийг хүлээж буй хөдөө нутгийнхандаа хэлэхэд, олон жил хуримтлагдсан, дарагдсан асуудлынхаа жагсаалтаа гаргаад цаад гурвыгаа хүлээж байх нь дээр болов уу. Том асуудлууд уулзалтын үеэр тэгсгээд шийдэгдээд, нүнжигтэй байнаа,  нэр дэвшигчид.

.

П.Баярхүү  /тоймч/