Онц хэрцгий аргаар хүний амь егүүтгэсэн хэрэгт татагдсан  16 настай У, Г нарын гэм буруутай эсэхийг өчигдөр шүүх бүрэлдэхүүн Баянзүрх дүүргийн шүүхэд  таван цаг хиртэй хэлэлцсэний эцэст тэдэнд  тус бүр 15 жилийн хорих ял оноолоо. Шүүх хуралд улсын яллагчаар нийслэлийн Прокурорын газрын хяналтын прокурор Г.Мижидорж, өмгөөлөгчөөр Б.Ганбаатар, Г.Хишигжаргал, Б.Баясгалан, Н.Лхавгацэрэн нар хохирогч, шүүгдэгч нарт эрх зүйн туслалцаа үзүүлсэн юм. Түүнчлэн хохирогчийн эцэг, эх, шүүгдэгч Г-ын аав, ах эгч нь ирсэн байв. Хэргийн талаар нэхэн сануулбал өнгөрөгч зургадугаар сард Г, У нар 20 настай эмэгтэйг гэртээ дагуулан аваачиж хөнөөгөөд улмаар цогцсыг нь талийгаачийн автомашинд ачиж аваачин шатааж хогын цэг дээр  нуусан хэрэг үйлдсэн юм. Тухайн өдөр талийгаач аавынхаа суудлын автомашиныг жолоодон гэрээсээ гараад сураггүй болсон тул ар гэрийнхэн нь Замын цагдаагийн газарт машины дугаарыг нь тэмдэглүүлсэн байна. Яг тэр үеэр   У, Г нар талийгаачийн автомашиныг жолоодон хотын хөдөлгөөнд оролцож байгаад  замын цагдаагийн газрын ажилтнууд саатуулагджээ. Тэд жолооны үнэмлэхгүй хөдөлгөөнд оролцож байсан учраас цагдаагийн ажилтнууд , фото зургийг нь хальсанд буулган авч машиныг нь журмын хашаанд саатуулжээ. Улмаар  хүүхдүүдээс тайлбар аваад явуулсан байж. Гэтэл тэдний жолоодож явсан автомашин эрэн сурвалжлагдаж буй эмэгтэйнх болох нь тогтоогдсноор сэжигтнүүдийг  УМБГ болон Баянзүрх дүүргийн цагдаагийн ажилтнууд эрэн сурвалжилж хэдхэн цагийн дотор баривчилсан байна. Тэд хохирогч эмэгтэйг амийг хөнөөгөөд хаана цогцсыг нь шатаасан болохоо нэг бүрчлэн хэлснээр талийгаачийн цогцсыг олж тэднийг Цагдан хорих төвд саатуулан 20 настай эмэгтэйг хөнөөсөн хэрэгт сэжигтнээр тооцон шалгаж эхэлсэн билээ. Уг хэрэг хууль хяналтынхан таван сар хиртэй шалгасны эцэст өчигдөр шүүсэн юм. Шүүх хурлын үеэр хохирогч болон шүүгдэгчийн ар гэрийнхэнтэй уулзлаа. Х.Цагаач: Таван хүүхэд энэ хэргийг хамтран үйлдсэн гэж бодож байна -Та шүүх хуралд оролцохгүй байсан юм уу? -Хаалттай болох шүүх хуралд зөвхөн эцэг эхийг нь оруулна гэж байна шүү дээ. -Таны ач талийгаач эмэгтэй шүүгдэгч нартай хэр дотно харилцаатай байсан бэ?. Та тэднийг таних уу? -Үгүй, эмээ нь тэр хүүхдүүдийг танихгүй. У, Г нар мөрдөн байцаагчид өгсөн мэдүүлэгтээ талийгаач охины минь найз байсан гэж хэлсэн байдаг юм билээ. Манай гэр бүлийнхэн дээрх хоёр хүүхдийг огт танихгүй. -Талийгаач охиныг сураггүй болсны дараа шууд цагдаад мэдэгдсэн үү? -Тэр аймшигтай өдөр буюу өнгөрөгч зургаадугаар сарын 16-ны өдөр охин ээжтэйгээ хамт Нарантуул захаар орчихоод гэр рүүгээ буцахдаа замдаа ээжийгээ ажилд нь хүргэж өгсөн юм билээ. Тэгээд ээж нь охиныг “Гэртээ хариарай” гэж хэлээд үлдэж. Гэтэл охин тэр өдөр алга болоод бүр хоёр хоногийн дараа амийг нь егүүтгээд цогсыг нь шатаасан байдалтай олдсон.  Энэ хэрэгт уг таван хүүхэд шалгагдаж байсан юм. Гэтэл хэргийг шалгах явцад нөгөөх гурван хүүхэд нь холбогдолгүй болох нь тогтоогдсон гэсэн. Миний бодохоор энэ таван хүүхэд бүгд миний ач охины амь насыг бүрэлгэхэд оролцсон байх. Яах аргагүй зохион байгуулалтай хэрэг гэж үзэж байна би. Амийг амиар гэдэг шүү дээ. Ялын дээд хэмжээ шүүхээс оноох байлгүй.  Бид насан туршийн гомдолтой үлдлээ. Талийгаач  У,Г нартай танилцаад хэр удсан байсан юм бол оо? -Миний охин гэрээсээ гарахгүй. Даруухан хүүхэд байсан юм. Тэр хоёр хүүхдийг яаж таньдаг болсон юм бүү мэд. Манай гэр бүлийнхэн өнөөдөр / өчигдөр/ энэ хоёр хүүхдийн царайг харлаа. Урьд өмнө нь огт уулзаж байгаагүй. Манайх Гачууртад, энэ хоёр хүүгийнх Шархаданд гэр нь амьдардаг гэж байна лээ. Энэ үеэр шүүгдэгч Г-ын ах сэтгүүлчдэд хандан дараах асуултад хариулсан юм Ч.Баяржаргал: Мөрдөн байцаагч н.Гантулга дүүгийн маань захидлыг урж хаясан -Дүүтэйгээ уулзав уу? -Хоригдож байхад нь нэг удаа уулзсан. Ар гэрийхэндээ бичсэн дүүгийн минь захидлыг УМБГ-ын мөрдөн байцаагч н.Гантулга ураад шидсэн гэсэн. Миний дүү тэр захидалдаа өөрийгөө буруугүй, хэргийн талаар дэлгэрэнгүй бичсэн гэж хэлж байна лээ. Тэр захидлыг бид өнөөг хүртэл олж аваагүй байна. -Захидалдаа юу гэж бичсэн бол? -Тэрийг би уншаагүй болохоор сайн мэдэхгүй байна. Ямар ч байсан өөрийнхөө тухай бичсэн. -Мөрдөн байцаалтын үед дүүтэйгээ уулзсан юм байна. Хэргийн талаар юу гэж байх юм? -Хэрэг хийгээгүй, хүн алаагүй гэж байна лээ. -Дүү тань талийгаачтай үерхдэг байсан гэж үнэн үү? -Үгүй, миний дүү талийгаачийг танихгүй. -Хэрэгт холбогдох үед дүү тань юу хийдэг байсан бэ? -Дунд сургуулиа төгсөх гэж байсан юм. Хайран сайхан хүүхэд. Харуусмаар байна. Би юу ч хэлэх билээ дээ. Гавьяа байгуулсан биш дээ. Н.Түвшин