Б.Нямтайширын Номтойбаяр “Номтойбаян” болохоо харуулахаар зүтгэж эхэллээ. Зүтгэж эхэллээ ч гэж дээ, бодитоор харуулах болж. Монголын Алт ХХК-ийн дэд ерөнхийлөгч, “Мак” сангийн тэргүүн Н.Номтойбаярын санаачилгаар  Ерөнхий боловсролын сургуулийн ахлах ангийн сурагчдын  дунд “Эрдмийн түлхүүр-Хөгжлийн тулгуур” хөтөлбөрийг зарлаж, Монгол Улсын Ерөнхийлөгч асан Н.Багабанди гуайн бичсэн “Титэм үг” номын нэрээр илтгэлийн уралдаан амжилттай зохион байгуулсан байна. Тэрбээр өнгөрсөн хавар анхны уралдаанаа ертөнцийн наран түрүүлж мандах Дорнод нутгийн ЕБС-ийн 1968 хүүхдийн дунд “Титэм үг” илтгэлийн уралдааныг зохион байгуулжээ. Ингээд багаар ажиллах чадвар, хувь хүний вакумжуулсан сургалт, сайн үйлсийн аян гэх мэт “Мак” сангийн зохион байгуулагчдын төлөвлөсөн арга хэмжээ бүрт нийт 33 шилдэг сурагчийг шалгаруулсан аж. Гран При шагналын шилдэг гурван сурагч багшийн хамт Хонг Конг дахь хүүхдийн мөрөөдөл Дисней Лэндэд аялж, эх орноо үүнээс илүү түвшинд хөгжүүлнэ гэсэн өөдрөг хүсэл өвөртөлсөөр эргэн ирсэн сурагтай. Мэдээж Н.Номтойбаяр нь мөнгөтэй хүн юм болохоор мөнгөөр л энэ бүх ажлыг амжуулсан байж таараа. Нийт төсөв нь 90 сая төгрөг бөгөөд шагналын сан нь 33 сая төгрөг бүхий “Титэм үг” уралдааны шилдэгээр шалгарсан 33 хүүхэд тус бүрт 300,000 мянган төгрөг өгсөн талаар дорнодчууд хуучлах аж. Харин гуравдугаар байрт шалгарсан хүүхдэд 500,000 төгрөг, хоёрдугаар байрт шалгарсан сурагчид нэг сая төгрөг, нэгдүгээр байрт шалгарсан сурагчийг 1,5 сая төгрөгөөр шагнасан гэнэ. Гэхдээ энэ мөнгийг сурагчдын гар дээр бэлнээр олголгүйгээр сургалтын төлбөр, курс дугуйлан гэх мэт мэдлэгт нь хөрөнгө оруулах маягаар олгосон байна. Ном бол ертөнцийг харах цонх гэдэг. Харин Н.Номтойбаяр улс эх орны хөгжлийн ирээдүй болсон  Дорнодын хүүхэд, багачууд, залуусыг номонд дуртай болгох, номоор дамжуулж дэлхий ертөнцийг харах, хамгийн гол нь өөрийнхөө мэдлэгийг дээшлүүлэх, хүсэл тэмүүлэл, мөрөөдөлдөө хүрэх анхны алхамыг нь амжилттай эхлүүллээ. Эхлүүлсэн гэхийн учир нь тэрбээр “Эрдмийн түлхүүр-Хөгжлийн тулгуур” уриатай “Титэм үг” илтгэлийн уралдааныг 21 аймагт зохион байгуулахаар төлөвлөөд байна. Тэгэхээр хэн их шамдана, тэр хүүхэд Монголын тэргүүн баяны буянг эдлэх бололтой. Нөгөөтэйгүүр Монголын толгой баяны залуу өв залгамжлагч болж төрснөөрөө бусдын өмнө гэмтэй юм шиг амьдардаг Н.Номтойбаяр зөвхөн мөнгө амьдралд голлох үүрэг гүйцэтгэдэггүй, боловсрол, амьдрах ухаан хамгийн чухал зүйл юм гэдгийг номоор дамжуулахаар зорьж байгаа аж. Ийнхүү Н.Номтойбаяр “Номтойбаян” болохоо харууллаа. Канцлерийн айчлал буюу Н.Номтойбаярын алсын хараа Монгол Улс болон Холбооны Бүгд Найрамдах Герман Улс хоорондын төр засаг төдийгүй хувийн хэвшлийнхний холбоо харилцаа, харилцан ашигтай хамтын ажиллагаа эрчимтэй хөгжсөөр байна. Н.Номтойбаяр “Номтойбаян” гэдгээ амьдрал дээр баталсан бас нэгэн үйл явдал нь Монголын уул уурхайд Германы сайн технологийг нэвтрүүлсэн явдал. Тодруулбал МАК компани Холбооны Бүгд Найрамдах Герман Улсын Bucyrus компаниас нийт 38,660,683 еврогийн өртөг бүхий 9 ширхэг өндөр хүчин чадлын экскаватор, дагалдах сэлбэгийн хамт худалдан авахаар харилцан тохиролцсоны дагуу өнгөрсөн тавдугаар сард гэрээнд гарын үсэг зурлаа гэж тухайн үед хэвлэл мэдээлэлээр шуугиж байв. Энэ утгаараа Монголын төр “МАК”, тодруулбал Н.Номтойбаяраас арай хожуу сэтгэж, хөдөлж байна. МАК аль хэдийнээ герман технологийг Монголын уул уурхайд оруулчихаад байхад Засгийн газар дөнгөж сая л Канцлерийг манайд айлчлахад энэ тал дээр хамтран ажиллах хүсэлтээ илэрхийлсэн билээ. “Номтойбаян” байна аа гэж, ийм л учиртай байдаг байх нь.