- Хэрэв шүүхээс та бүхэнд  өндөр торгууль, хорих ял оноовол та бүхэн тэмцэх хүслээсээ татгалзах уу? - Бидний хувьд хэзээ ч шантрахгүй. Улс орондоо зөв эргэлт авчирахын төлөө энэ бие, амьдралаа зориулна. Энэнд эргэлзэх хэрэггүй. Цаг хугацаа үйл хэрэг юуны төлөө байсныг  харуулна. Энэ нь хэнийх нь зөв байсан бэ гэдгийг батална. Монголчууд биднийг хараад зогсох биш хамтраад тэмцэх хэрэгтэй. - Ингээд шалгагдаад ирэхээр тэмцлийн эгнээнээс татгалзаж, шантарч байгаа хүн байна уу? - Гал үндэстэн холбоо гээд байж байгаад шийдвэртэй ажиллагаа эхлүүлэхэд зарим нь гарсан. Хөх Монгол бүлгэм татгалзсан. Энэ явдал арай ширүүдэж байна гэж хэлээд явсан.

- Дэлхийн хэмжээний хүн буу барихгүйгээр тэмцэж болоогүй юм уу? - Бид буу барихгүйгээр, буунаас бусад бүх арга хэрэгслийг хэрэглж 10 жилийн турш тэмцсэн. Зарим уул уурхайн компанитай зодоон нүдээн хийж  ч байсан. Энэ чинь 10 жилийн өмнөх асуудал шүү дээ. Тиймээс бид байгаль орчны тухай хуульд нэмэлт өөрчлөлт оруулах саналыг тавьж батлуулсан. Энэ нь Засгийн газрыг шүүхэд өгөх эрхзүйн боломжийг нь баталгаажуулж авсан гэсэн үг.  Нийтийн эрх ашгийг хэрхэх вэ гэдэг асуудлыг хууль тогтоомжоос хайгаад олддоггүй. Тиймээс энэ асуудлыг хуулинд тусгаж зүтгүүлээд Засгийн газрыг хариуцагчаар татаж болно гэдэг зүйлийг оруулсан юм.

Мөн “Онги гол”-ынхон 21 мянган модыг голын дагуу суулгасан. Эх дэлхийгээ хайрлах, гол усаа хамгаалах, тэмцэх талаар сурах бичиг гаргасан. Мөн суулгасан мод болон ган гачигтай үед бороо оруулах зорилгоор газрын генератор суулгасан гээд бидний хийсэн ажил их бий.  Тэгэхээр эдгээр зүйлийг хэлддэггүй болохоор хүмүүст тэр бүр хүрэхгүй байх шиг байна. Харин буу шийдэм барьж тэмцсэнийг нь илүү ихээр мэдээлсэн болохоор бууны асуудал их яригдаж байгаа байх.