Азийн цээжин дэх хөх Монголд анхны цас хэдийнээ орж, өвөл цагийн өмсгөлөө нөмөрчээ. Цагийн аяс даган хувирч байдаг эх орны минь нэгэн хэсэгт ийм л өвөл болж байна. Тэгээд ч цагийн араншин даган нүүдэллэж байдаг түмэн маань юуг ч үл ажран амьдарнам. Зун зуныг өртөөлөн нүүдэллэж ирсэн ардын маань хувьд эргэх дөрвөн улирал дөрвүүлээ л маш чухал зүйл. Тэр тусмаа цагаан хуягтай өвөл цаг бол байгалийн шалгарлаар амьдарч чаддаг бүх л зүйлийг шалгаж өгдөг улирал билээ. Тийм ээ, өвөл цаг айсуй. Уулын өвөл нэг иймэрхүү л болдог доо гэж хэн ч санаа алдах биз ээ.