Монголын үндэстэн ястануудын зан заншил, амьдралын хэв маягийг харуулсан үндэсний хувцсаар гоёсон 5204 бий биелээч өнөөдөр Сүхбаатарын талбайд цуглалаа. Тэд өнөөдөр монгол ардын язгуур урлагийн нэгэн төрөл бий биелгээг Геннист бүртгүүлэхээр эх орныхоо дөрвөн зүг, найман зовхисоос хүрэлцэн ирсэн юм.

Энэхүү арга хэмжээнд Захчин, Баяд, Торгууд, Казак, Буриад, Өөлд, Хотон, Урианхай, Дөрвөд ястангууд өөр өөрсдийн үндэсний бий биелгээг бүжиж үзүүлсэн. Бий биелгээчдийн өнгө алаглуулан өмссөн хувцас, уран налархай хөдөлгөөн бүр нь үндэстэн ястануудын хэдэн зууны түүх, ёс заншил, амьдралын хэв маягийг илтгэж байлаа. Хамгийн өндөр настай бий биелээч нь Ховд аймгаас хүрэлцэн ирсэн 82 настай Т.Хорлоо эмээ байсан. Хамгийн бяцхан бий биелээч нь Баянхонгор аймгаас ирсэн гурван настай н.Золбоо хүү байсан юм. Төгсгөлд нь 5204 бий биелээчид “Жороо морины явдал”, “Хамаг монголын уриа” бүжгийг хамтаараа бүжин хурсан олныг баясгав. Төгсгөлд нь энэхүү арга хэмжээг зохион байгуулагч ардын язгуур урлагийн “Хөгсүү” чуулгаас Геннисийн холбоо “Бий биелгээ”-г бүртгэсэн болохыг хурсан олонд дуулгаж, батламжийн гэрчилгээний дээжийг ахмад биелээч Т.Хорлоо гуайд хүлээлгэн өгөв. Харин бусад бий биелээчдийн батламжийг тусад нь гардуулна гэдгээ мэдэгдсэн юм.

П.Наран

Гэрэл зургийг Б.Мөнх-Эрдэнэ