Эрчим хүчний зохицуулах хорооноос ирэх сарын 5-наас эхлэн цахилгааны үнэ нэмэгдэж, дулааны төлбөрт суурь хураамжийг нэмж тооцохоор боллоо. Уг салбарын алдагдал одоогоор 60 гаруй тэрбум төгрөгт хүрсэн тул цаашид халаалтын суурь хураамж авалгүй, цахилгааны үнээ тогтмол байлгана гэвэл эрчим хүч, дулааны доголдолд орж болзошгүй. Тиймээс сүүлийн 2 жил 3 сарын хугацаанд тогтмол байлгасан цахилгааны үнийг нэмэгдүүлэх болсноо албаныхан мэдээлсэн юм.

Өмнө нь Улаанбаатар хотын  орон сууцны болон бусад хот, сумын орон сууцны айл сард 150 киловатт цаг хүртэлх хэрэглээтэй бол нэг киловатт цахилгааныг 74 төгрөгөөр хэрэглэдэг байсан. Тэгвэл ирэх сарын 5-наас 79 төгрөг төлөх юм.

Улаанбаатар хотын гэр хорооллын болон бусад хот, сумын гэр хорооллын айл өрх нэг киловатт цахилгааныг 71 төгрөгөөр хэрэглэдэг байсан бол ирэх сараас 79 төгрөг төлөхөөр болжээ.

Сард 150-250 киловатт цаг хүртэл цахилгааны хэрэглээтэй Улаанбаатар хотын гэр хорооллын болон орон сууцны  айл өрхүүд нэг киловатт цахилгааныг  76-79 төгрөгөөр худалдан авдаг байсан бол ирэх сараас 90.85 төгрөг төлөх аж.

Сард 101 киловатт цагаас илүү цахилгаан хэрэглэдэг өрхүүд мөн адил нэг киловатт цахилгааныг 90.85 төгрөгөөр хэрэглэхээр болжээ.

Ингэхдээ хэрэв танайх сар тутам 170-200 киловатт цаг цахилгаан хэрэглэдэг бол шинэ тариф ёсоор эхний 150 киловатт цаг цахилгааныхаа киловатт тутамд 79 төгрөг, 151 киловатт цагаас илүү гарсан цахилгааныхаа киловатт цаг тутамд 90.85 төгрөг төлөх юм байна.

Харин уул уурхайн олборлох,  боловсруулах аж үйлдвэрүүд нэг киловатт цахилгааныг 100 төгрөгөөр авч хэрэглэдэг байсныг 30 хувиар нэмэгдүүлэн 130 төгрөг болгожээ. Түүнчлэн бусад үйлдвэр, аж ахуй нэгжүүд нэг киловатт цахилгааныг 88 төгрөгөөр хэрэглэдэг байсныг 20 хувиар нэмэгдүүлж 105.60 төгрөг болгон өсгөжээ.

Монгол Улс эрчим хүчний хэрэглээний оргил ачааллын үе буюу өвлийн саруудад нэг киловатт, цаг цахилгааныг Оросоос 130 гаруй төгрөгөөр импортолж хэрэглэдэг бөгөөд жил ирэх тусам импортын  цахилгааны хэмжээ нэмэгдэхийн хирээр үнэ нь ч давхар өсч байгаа ажээ.

Түүнчлэн наймдугаар сараас  эхэлж орон сууцанд амьдардаг иргэд байрныхаа хэмжээнээс хамаарч дулааны суурь хураамжийг ялгавартай төлж эхлэхээр болсон. Тодруулбал, 40 хүртэлх ам метр талбай бүхий орон сууцанд амьдардаг бол 3 мянган төгрөг, 40-80 ам метр бол 5 мянган төгрөг, 80 ам метрээс дээш бол 10 мянган төгрөгийг дулааны төлбөр дээрээ нэмж өгөхөөр болж байна. Ийнхүү халаалтын суурь хураамжийг иргэд нэмж төлөхөөр болсноос бус халаалт, дулааны үнэ нэмэгдээгүй байна.

П.Наран