Монголын уран зургийн галарейн  үзэсгэлэнгийн танхимд зураач, уран барималч Д.Анхбаярын “Салхин сар” нэртэй уран бүтээлийн үзэсгэлэн нээлтээ хийжээ. Өвөрмөц сонин үзмэр бүхий энэхүү үзэсгэлэнд тэрээр эротизмын өнгө аяс бүхий модон сийлбэр, хүрэл болон төмөр цутгуур зэрэг 16 бүтээлээ дэлгэн тавьсан аж. Тэрээр Монголын хамгийн анхны насанд хүрэгчдэд зориулсан үзмэр бүхий уран бүтээлийн үзэсгэлэнг дэлгэн үзүүлжээ. Уран бүтээлч маань үзэсгэлэнгээ “Салхин сар” гэж нэрлэсэн нь эрэгтэй эмэгтэй хүний арга билгийн зохилдолгоог салхин сарны явдал хэмээн нэрлэдгээс санаа авсан аж. Сараар мөнхөд оршихыг билгэдэж, салхиар дотоод сэтгэлийн сэрэл мэдрэмжийг төлөөлүүлжээ.

.

Түүний бүтээлүүд нь өнгөн талаасаа эротик шинж давамгайлсан харагдавч бие хүнийг бүрэлдүүлдэг эрэгтэй, эмэгтэй хүний арга билгийн зохилдлгооны мөн чанар, ариун нандин шинжийг харуулахыг зорьсон ажээ. Ингэхдээ уран бүтээлч өөрийн ертөнцийг үзэх үзлээр хүн болгоны мэддэг, тэр ч бүү хэл дотоод сэтгэлийг нь гижигдэж байдаг эр эмийн харилцааг уран сайхны аргаар, өөрийн барилаар бүтээжээ. Хамгийн гол нь филисофи сэтгэлгээг шингээсэн бүтээл гэдэг утгаараа үзсэн хэн бүхэнд сонин содон байх нь дамжиггүй.

.

Мөн түүний үзмэрүүд дунд зоосоор дүүргэсэн усны онгоц, элс, хатсан модны үндэсээр тэрээр дэлхий нийтээр уул уурхайн олборлолтыг эрчимжүүлж, байгаль экологийн тэнцвэрт байдал алдагдаж байна. Газраа ухаж, байгалаа сүйтгээд мөнгөтэй болж болох ч цөлжилтөд өртөж, уух усгүй болох вий гэж сэрэмжлүүлэхийг хүссэн. Хамгийн гол нь нэгийг сүйтгээд нөгөөг бүтээнэ гэдэг эцэстээ сүйрлийг дагуулдаг гэдгийг харуулахыг зорьсон гэнэ.

П.Наран

Гэрэл зургийг Б.Мөнх-Эрдэнэ