“Зэрлэг цэцэгсийн хүлэмж”-ийн клип, трэйлерийн нээлт боллоо
Хувьсал продакшны дэлгэцийн анхны уран бүтээл “Зэрлэг цэцэгсийн хүлэмж” уран сайхны киноны трэйлер, клипны нээлт өнөөдөр боллоо.
Нээлтэд кино зохиолыг бичсэн СТА жүжигчин Д.Ганцэцэг, найруулагч МУГЖ У.Уранчимэг, Жоохноогийн дүрийг бүтээсэн залуу жүжигчин А.Ганчимэг, Яргуйгийн дүрийг бүтээсэн Ардын дуу бүжгийн чуулгын бүжигчин М.Бямбаа болон киноны дууны үгийг бичсэн UBS телевизийн хөтлөгч Д.Одгэрэл нар оролцож, киноныхоо тухай мэдээлийг хийлээ.
Аливаа киноны клип, трэйлерийг бүтээхэд киноныхоо адил маш их хүч хөдөлмөр зарцуулдаг. Тиймээс уран бүтээлчдийнхээ хөдөлмөрийг болоод уран бүтээлээ хүндэлж нээлтийг нь тусад нь хийж байгаагаа найруулагч нь албан ёсоор мэдэгдэж байсан. Киноны дууг дуучин Б.Маралжингоо, Э.Агиймаа болон урилгаар дуучин н.Уранцэцэг нар дуулжээ.
“Зэрлэг цэцэгсийн хүлэмж” уран сайхны кино нь үндсэн долоон дүртэй бөгөөд түүний тавыг нь эмэгтэй хүн бүтээснээрээ онцлог юм. Мөн “Хувьсал” продакшны дэлгэцийн анхны уран бүтээл, “Hollywood”-ийн киног бүтээхэд хэрэглэдэг техник технологийн өндөр түвшний камер ашигласан, 1981 оны түүхэн үйл явдлыг гаргасан онцлогуудтай аж.
Өвөрмөц нэр, хурц, сонирхолтой үйл явдалтай энэхүү киноны нээлт ирэх сарын 12,13-ны өдрүүдэд “Тэнгис”, “Өргөө” кино театрт нээлтээ хийх юм.
Б.Будхүү
Гэрэл зургийг Б.Бат
СЭТГЭГДЭЛ БИЧИХ