“Зэрлэг цэцэгсийн хүлэмж” МУСК-ны клип трэйлерийн нээлт боллоо. Энэ үеэр тус киноны уран бүтээлчидтэй цөөн хором хөөрөлдлөө. Тэрээр уг киноны зохиолыг бичсэн юм.

-Кино зохиолоороо яг юу харуулахыг хүссэн бэ?

-Хүн гэдэг эрхэм алдарыг хүртсэн хүн бүхэн хайрлаж, хайрлуулах хэрэгтэй. Насан туршдаа эхээс төрөөд амталсан тэр хайраараа амьдрах ёстой. Бусдыг хайрлах хайр өөрийгөө хайрлахаас л эхэлдэг. Тиймээс юуны түрүүнд өөрийгөө хайрла гэдгийг л харуулахыг зорьсон.

.

-Зохиолоо бичихэд бэрхшээлтэй зүйл юу байв?

-Зарим үед бүр тохирох үг олдохоо байчихдаг. Нэг хүний дүрд тохирсон нэг өгүүлбэрийг олох гэж 3-4 хонож байсан тохиолдол ч бий. Сүүлдээ зохиолоо нээж харахаас ч залхдаг юм байна лээ. Анхны уншигч болсон зураглаач Б.Отгонзориг сэтгэгдэл өндөр байсанд маш их урам авсан.      

.

-1981 оны үйл явдлыг харуулсан гэсэн. Яагаад энэ үеийг сонгох болов?

-Намайг зохиолыг бичсэн гээд байгаа болохоос бид гурвын санаа, сэтгэлээс гарсан бүтээл юм. Кинонд маань Ардын хувьсгалын 60 жилийн ойн баярын өмнөх гурван өдрийн үйл явдал гарч байгаа. Жинхэнэ монгол хүний цайлган цагаан сэтгэлийг өнөөгийн нийгэм, хойч үедээ харуулахын тулд энэ цаг үеийг сонгосон. Энэ сонголтыг ч мөн бид гурав хамтдаа ярилцаж хийсэн.

.

-Та ямар дүр бүтээв?

-Миний хувьд Саарал гэх танхай эмэгтэйн дүрийг бүтээсэн. Энэ дүр надаас болоод миний тоглож байсан дүрүүдээс ондоо. Яагаад гэвэл бид гурав урьд өмнө бүтээж байсан дүрүүдээсээ огт өөр дүрд тоглохоор шийдсэн юм.