Жүдо бөхийн насанд хүрэгчдийн дэлхийн аварга шалгаруулах тэмцээн Бразилийн Рио-де-Жанейро хотноо өчигдөр эхэлсэн. Тэмцээний эхний өдөр хуваарийн дагуу эмэгтэйчүүдийн 48 кг, эрэгтэйчүүдийн 60 кг-ын жинд шилдгүүд тодорсон бөгөөд 48 кг-ийн жинд өрсөлдсөн ОУХМ М.Уранцэцэг жингийнхээ ангилалд аваргаллаа. Тэрээр аваргын төлөө барилдаанд 2010 оны дэлхийн аварга, Японы тамирчин Харуна Асамитай барилдаж 2:18 минутад цэвэр ялж, алтан медалийн эзэн болсон. Монгол улсын түүхэнд жүдогийн дэлхийн аваргаас авч байгаа хоёр дахь алтан медаль нь энэ бөгөөд 2009 онд Монгол Улсын гавьяат тамирчин Х.Цагаанбаатар анхны алтан медалийг хүртэж байсан билээ.

Түүнчлэн эрэгтэйчүүдийн 60 кг-ийн жинд ОУХМ Д.Амартүвшин мөнгөн медалийн эзэн болж, мөн тус жинд зодоглосон ОУХМ Г.Болдбаатар тавдугаарт байрт шалгарлаа.

Энэ жилийн дэлхийн аваргын нэг онцлог нь Олон улсын жүдо бөхийн холбоо /IJF/-ноос баталсан шинэ дүрмийн дагуу явагдана. Өмнө нь ДАШТ-д оролцож буй улсуудын хувьд нэг жинд тус бүр хоёр тамирчнаа сойх эрхтэй байсан бол энэ жилээс эхлэн эрэгтэй, эмэгтэй төрөлд тус тус есөн тамирчнаа оролцуулах юм. Харин аль жинд хэдэн тамирчин оролцуулах эсэхийг тухай улсын жүдогийн холбоо нь шийдэх ажээ.

Монголын Жүдо бөхийн холбооны тухайд эрэгтэйчүүдийн барилдаанд хөнгөн жиндээ гол анхаарлаа хандуулж, 60, 66 ба 73 кг-ын жинд тус тус хоёр тамирчнаа сойхоор шийдвэрлэжээ. Харин 81, 90 болон -100 кг-д тус тус нэг тамирчин дэлхийн аваргын татамид хүч сорих бөгөөд +100 кг-д өрсөлдөх Б.Сугаржаргал нь хувийн барилдаанд бус багийн барилдаанд зодоглох юм байна. ДАШТ-д оролцох Монголын багийн бүрэлдэхүүнийг танилцуулбал,

Эрэгтэй 60 кг: Д.Амартүвшин, Г.Болдбаатар

• 66 кг: С.Мияарагчаа, Д.Төмөрхүлэг
• 73 кг: Х.Цагаанбаатар, С.Ням-Очир
• 81 кг: О.Ууганбаяр
• 90 кг: Х.Цогтгэрэл
• -100 кг: Б.Тэмүүлэн
• +100 кг: Б.Сугаржаргал

Эмэгтэй 48 кг: М.Уранцэцэг, Г.Отгонцэцэг

• 52 кг: А.Цолмон, Б.Бат-Эрдэнэ
• 57 кг: Д.Сумъяа
• 63 кг: Ц.Цэрэнханд, Б.Мөнгөнчимэг
• 70 кг: Ц.Наранжаргал
• 78 кг: Т.Мөнхтуяа

Д.Цэцэг