Зориулалтын автозогсоол дээр бус дүрэм зөрчиж замын хөдөлгөөнд саад учруулж, нэгдүгээр эгнээнд зогссон тээврийн хэрэгслийг тусгай зориулалтын автомашинаар зөөж шилжүүлэх, ачиж буулгах зориулалттай гурван төрлийн автомашиныг өнөөдөр Замын хөдөлгөөний удирдлагын төвөөс танилцууллаа.

.

Тодруулбал, Улаанбаатар хотод Замын хөдөлгөөний дүрэм зөрчин замын нэгдүгээр эгнээнд тээврийн хэрэгсэл зогсох нь тухайн авто замын хөдөлгөөн нэвтрүүлэх чадварыг бууруулж тээврийн хэрэгслээр зорчигч, жолооч нарын хөдөлгөөнд оролцох хугацааг нэмэгдүүлж улс орон, хувь хүмүүсийг эдийн засгийн алдагдалд оруулах, зам тээврийн осол гарах  шалтгаан нөхцөл болж байна. Хөдөлгөөний нягтрал ихтэй үед автомашинууд хажуу хоорондын зай бариагүйгээс мөргөлдөх, шүргэлдэх хэлбэрээр осол ихээхэн бүртгэгдэж байгаа.

.

Тиймээс дээрх арга хэмжээ хэрэгжснээр замын хөдөлгөөнд саад учруулсан тээврийн хэрэгслийг тусгай зориулалтын автомашинаар ачиж зөөвөрлөн авто замын зорчих хэсгийг чөлөөлөх юм.

.

Жолооч нар журам зөрчсөн торгууль болон ачиж тээвэрлэсэн зардлыг төлж автомашинаа авна

.

 Ингээд Замын хөдөлгөөний удирдлагын төвийн дарга Л.Батцоожоос зарим зүйлийг тодруулсан юм.

.

-Танай төв замын хөдөлгөөнд саад учруулсан тээврийн хэрэгслийг тусгай зориулалтын автомашинаар ачиж зөөж, тээвэрлэх ажлыг хийж байхаар боллоо. Энэ ажил хэзээнээс хэрэгжиж эхлэх вэ?

-Нийслэлийн замын хөдөлгөөний түгжрэлийг бууруулах зорилгоор шат дараалласан олон арга хэмжээ авч байгаа. Тухайлбал, дугаарын хязгаарлалт хийх, нийтийн тээврийг I эгнээгээр саадгүй зорчуулах, хотын төвийн зогсоолуудыг төлбөртэй болгох зэрэг  цогц арга хэмжээнүүдийн нэг хэсэг нь хотын төвийн автозамын зорчих хэсэг дээр зогссон тээврийн хэрэгслийг замын хөдөлгөөний журамд заасан, түр зогсохыг хориглосон хэсэгт автомашинаа зогсоосон тохиолдолд зөөж, тээвэрлэх тусгай зориулалтын автомашиныг Нийслэлийн хөрөнгө оруулалтаар худалдан авч энэ ажлыг Замын хөдөлгөөний удирдлагын төвд хариуцаж, өнөөдрөөс үйл ажиллагаа нь эхэлж байна. Одоогоор эхний ээлжийн найман ширхэг автомашиныг оруулж ирлээ.

.

-Энэ шинэ автомашины онцлог, давуу талыг дурдвал?

-Энэхүү ачиж, тээвэрлэх ажил анх удаагаа болж байгаа үйл явц биш. 2005 онд Хууль зүйн сайдын баталсан тогтоолоор, энэ журам хэрэгжиж байсан эхэлсэн. Гэхдээ уг ажлыг ачиж, тээвэрлэх машин оруулж ирсэн хувийн компаниуд төртэй хамтарч хийж байсан.

Энэ удаа төрөөс онцгойлон анхаарч,  хөрөнгө оруулалт хийж, шинэ автомашинууд оруулж ирсэн. Дараагийн нэг онцлог бол техникийн үзүүлэлт сайжирсан байгаа. Яг манай нөхцөлд тохирсон техникийн үзүүлэлттэй автомашин байгаа. Тодруулбал, автомашинуудыг чирч явснаар урд хойд гуферыг нь газар чирэх гээд асуудал гардаг. Тэгвэл энэ машинуудад ролктой дугуйнууд байгаа. Тэр дугуйнуудыг тухайн чирч яваа автомашины дугуй доор нэмж хийгээд тухайн машины нэлээд өндөрлөх учраас ямар нэг байдлаар сэвтээхгүй. Мөн гар тормосоо татаад орхисон, автомат машинуудыг ямар ч эвдрэл гэмтэлгүй тээвэрлэнэ.

Мөн өмнө нь ашиглаж байсан чиригч автомашинууд зөвхөн урд нь зогсож байгаа ачдаг байсан.  Бол шинэ автомашинууд цуваад зогсож байгаа машинууд дундаас нь нэгийг хажуунаас суглаж авах боломжтой.

.

-Ачиж тээвэрлсэн автомашинуудыг  хаана аваачих вэ?

-Журмын хашаанд хүргэж өгнө. Жолооч нар журам зөрчсөн торгууль болон ачиж тээвэрлэсэн зардоыг төлж автомашинаа авна.

.

-Ачиж, тээвэрлэх зардал хэд байх бол?

-Журмын дагуу захын зээлийн бодит  үнэ ханшийн дагуу торгуулийг төлнө. Энэ зардалд юу юу орох вэ гэвэл тээвэрлэгч машины шатахууны үнэ, жолоочийн цалин үйл ажиллагааны зардлаас гадна энд ажиллаж байгаа завсарчин, инженерүүдийн зардлыг авна Өмнө нь  60 мянган төгрөгөөр ачдаг байсан. Одоо машины том жижиг, маркаас хамаараад зардал янз бүр байна.

.

-Нэгдүгээр эгнээд орхиод явсан иргэн автомашин нь байхгүй бол хаана хандах вэ?

-Хэрэв автомашин зогсох ёсгүй газар орхиод явсан бол 7000-4455 дугаар болон цагдаагийн шуурхай удирдлагын төвийн 102 тоот утаснаас лавлаарай.

Д.Цэцэг

Гэрэл зургийг Б.Мөнх-Эрдэнэ