Г.Мандахнаран хүрэл медаль хүртлээ
Унгарын нийслэл Будапешт хотноо болж буй чөлөөт бөхийн дэлхийн аварга шалгаруулах тэмцээний эрэгтэйчүүдийн 66 кг-ын жинд Ганзоригийн Мандахнаран хүрэл медаль хүртлээ.
Г.Мандахнаран эхний тойрогтоо гоц мөргөөд, хоёрдугаар тойрогт Украины бөх С.Радуловыг 10:4-өөр, гуравдугаар тойрогт Унгарын бөх Г.Веллерийг 9:2-оор, дөрөвдүгээр тойрогт Грекийн бөх А.Трианфиллидисийг 11:3-аар ялж, бүсийн аваргын төлөө буюу мөнгөн медалийн төлөө Кубын бөх Ливан Лопестой барилдаж 6:6-аар оноо тэнцсэн ч өрсөлдөгч нь бүхэл онооны чанараар манай бөхийг ялжээ. Ингээд хүрэл медалийн төлөө БНАСАУ-ын бөх Кан Жин Хюктай барилдаж, 3:1-ээр ялснаар чөлөөт бөхийн эрэгтэй тамирчдын олон жилийн турш хүлээсэн дэлхийн аваргын медалийг авчирлаа.
Тэрээр сүүлийн хэдэн жилийн турш Монголын чөлөөт бөхийн хамгийн шилдэг тамирчдын тоонд нэрлэгдсээр ирсэн тамирчин юм. Манай чөлөөтийн эрэгтэй тамирчдын хувьд 2007 оны Бакугийн дэлхийн аваргаас Б.Наранбаатар мөнгөн медаль хүртснээс хойш дэлхийн аваргаас медаль хүртээгүй байсан тул ихээхэн хүлээлт үүсээд байсан билээ. Ийнхүү чөлөөт бөх олимпийн наадмын хөтөлбөрт үлдсэнээс хойш хэдхэн хоногийн дараагаар Г.Мандахнаран дэлхийн аваргын хүрэл медаль хүртэж байна.
Б.Буд
СЭТГЭГДЭЛ БИЧИХ