Эрүүл мэндийн  сайдын тушаалаар өнгөрсөн сарыг оюутны эрүүл мэндийг дэмжих сар болгон тэмдэглэн өнгөрүүлж байсан. Тэгвэл энэ сарыг ахмадын эрүүл мэндийг дэмжих сар болгон зарлажээ. Үүнтэй холбоотойгоор Сэтгэцийн эрүүл мэндийн үндэсний төвөөс “Ахмад настны сэтгэцийн эрүүл мэнд” сэдвээр сэтгүүлчдэд мэдээлэл хийлээ.

5

Сэтгэцийн эмгэг нь ахмад настнуудын дунд их тохиолддог бөгөөд өндөр настнуудын долоон хувь нь сэтгэл гутрал, таван хувь нь тэнэгрэлээр өвддөг байна. Харин тэдний нэг хүртэлх хувь нь архины болон бусад бодисын хараат байдалд өртсөн байдаг аж. Ахмадууд нийгмээс тусгаарлагдах, санхүүгийн бэрхшээлд орох, зарим нэг бие махбодийн өвчний улмаас сэтгэлийн хямралд орж, сэтгэцийн болон биеийн эмгэгтэй болдог байна.

5

Хурлын үеэр СЭМҮТ-ийн захирал Л.Насанцэнгэл “Манай улс сэтгэцийн эрүүл мэндийн тухай хуультай цөөн орнуудын нэг. Түүнд заасныхаа дагуу иргэдийнхээ сэтгэцийн эрүүл мэндэд анхаардаг. Ялангуяа ахмад настны сэтгэцийн эрүүл мэнд чухал байдаг. Энэ асуудлыг ДЭМБ нь бусад улс орнуудад тусалдаг. Ахмадууд сэтгэцийн эрүүл мэндийн асуудалтай болох эрсдлийг бие махбодийн архаг хууч өвчин, цус харвалт, чихрийн шижин болон цусны даралт ихсэх зэрэг өвчин улам нэмэгдүүлдэг. Ер нь ахмад настнуудад анхаарал халамж дутагдсанаас янз бүрийн эрсдэлд өртөх нь элбэг байдаг” гэж ярилаа.

Б.Буд