Хүнс тэжээлийн хангамжийн төсөл энэ оноос хэрэгжиж эхэлсэн байна. Төслийн хүрээнд одоогийн байдлаар 10 орчим тэрбум төгрөг зарцуулаад байгаа аж. Хөтөлбөрийн санхүүжилтийн хүрээнд 20 сая ам.долларын төслийг Азийн хөгжлийн банкнаас жилийн хоёр хувийн хүүтэй 25 жилийн хугацаанд төлөх юм байна. Үүнээс эхний таван жилд үндсэн өрийн төлбөрөөс чөлөөлөгдөх ажээ. Хөтөлбөрийг хэрэгжүүлэх манай Засгийн газраас гурван сая ам.долларын хөрөнгө оруулалт хийх шаардлагатай юм байна.

Хэлэлцэж байгаа асуудалтай холбогдуулан гишүүдийн сонирхсон асуултад Хүн амын хөгжлийн сайд С.Эрдэнэ хариулсан юм.

6

УИХ-ын гишүүн Р.Амаржаргал:

-Монгол талын хөрөнгө болох гурван сая ам.доллар ирэх оны төсөвт суусан уу.  Энэ төсөл анх хэрэгжихдээ “Хүнсний талон” хэлбэрээр  хэрэгжиж эхэлсэн. Үүнийг үргэлжлүүлэх үү? Хэдэн хүн хамрагддаг юм бэ?

-Нийгмийн халамжийн үйлчилгээний чанарыг эрс сайжруулах чиглэлээр энэ хөтөлбөрийг хэрэгжүүлж байгаа. Бид нийгмийн даатгалын IT тоног төхөөрөмжийг сайжруулж, сүлжээг бий болгосноор зорилтот бүлэг рүү чиглэсэн үйл ажиллагааны чанарт үр дүн гарна гэж бодож байгаа. Өмнөх хөтөлбөрийн хүрээнд 400 мянган өрхийг уг хөтөлбөрт хамруулсан. Зорилтот бүлгээ зөв тодорхойлсноор хүртээх зарчмаар биш амьжиргааны наад захын асуудлыг хангасан хэмжээнд үзүүлэх бодит боломжийг бүрдүүлнэ. Хүнс хангамжийн талоныг үргэлжлүүлэн хангана. Эмзэг бүлэгт хамарч байгаа өрхийн хүнсний хангамжийг үргэлжлүүлэн олгоно.  Том хүнд 70 мянган төгрөг, хүүхдэд 50 мянган төгрөгийн  хүнсний талоныг  нийт 320 мянган хүнд өгөх юм байна.

6

УИХ-ын гишүүн Д.Хаянхярваа:

-320 мянган хүнд хүнсний талон олгоход төсвөөс хэдэн хувь нь гардаг вэ?

-Азийн хөгжлийн банкны  гурван сая ам.долларын тусламжийн хүрээнд энэ хөтөлбөрийг хэрэгжүүлж эхэлсэн. Төсөвт 2013 оны долоодугаар сараас эхэлж суулгасан байна. Энэ онд нийгмийн халамжийн багцад тусгаж, аймаг орон нутгийн багцад оруулсан байна.

6

УИХ-ын гишүүн Л.Энх-Амгалан:

-Хөдөө орон нутагт маргаан тарсан хөтөлбөр байгаа юм. Ядуу иргэдийг тодорхойлоход баг, сумын дарга нар оролцдог байсан. Өнгөрсөн жилээс орлого орлуулан тооцох аргачлал  гэж гаргаад ядуу иргэдийг сонгосон юм билээ. Гэтэл энэ аргачлалаар хүнсний талон очих шаардлагатай байгаа иргэдийг олж чадсангүй гэсэн маргаан явдаг. Энэ хөтөлбөр хэрэгжсэнээр мэдээлэл технологийн дэд бүтэц бий болох юм байна гэж ойлгож байна.

-Орлого орлуулан тооцох аргачлалыг хуудуутай гаргасан. Орон нутгийн Засаг дарга нарыг оролцуулаагүй зэрэг яриа гарсан. 400 мянган өрх дээр дахин хяналтын судалгаа хийсэн. Үлдсэн 360 мянган өрх дээр судалгаа явуулсан. Нийт өрхөө хамруулах ажил хийгдээд явж байгаа. Энэ ажил 21 аймаг есөн дүүрэгт хэрэгжиж байна. Судалгаа маань энэ төсөлтэй уялдаж хийгдэж байна.  Мэдээллийн сантай болох зорилгоор энэ төслийг хэрэгжүүлж баайгаа юм.

5

УИХ-ын гишүүн Ч.Хүрэлбаатар:

-“Хүнс тэжээл, нийгмийн халамжийн төсөлд нэмэлт санхүүжилт” гэж байгаа. Гэтэл халамжийн асуудал хэлэлцэх юм байна гэхээр тоног төхөөрөмж, программ хангамжид зориулагдсан байх юм. Нэг тэрбум орчим төгрөгийг зөвлөх үйлчилгээнд тавьсан байна.

-Азийн хөгжлийн банктай ярилцаад өмнөх төслийн үргэлжлэл хэлбэрээр оруулж ирвэл урт хугацаанд хэрэгжинэ гэсэн. Тиймээс нэр томъёо зөрүүтэй байгаа юм.  Зээлийн нэгж төслийн талаар гэрээ хийх явцад шийдэгдэнэ.

Энэ төсөлтэй холбогдуулан гишүүд  “Талон нь очих хүндээ очихгүй байна. Бодлогын тал дээр нь анхаараарай. Хүн амын талаарх мэдээллийн системийг бий болгох гэж байгаа нь зүйтэй. Ард иргэдээ бүртгэлжүүлэхдээ Улсын бүртгэлийн сангийн мэдээлэлтэй хамтатгах хэрэгтэй”  гэх зэрэг саналыг хэлж байлаа. Ингээд Монгол Улсын Засгийн газар Азийн хөгжлийн банкны хооронд байгуулах Хүнс тэжээлийн төсөлд нэмэлт санхүүжилтийн зээлийн гэрээний төслийг дэмжив.

Дараагаар нь Эдийн засгийн байнгын хорооны хуралдаан үргэлжиллээ. Төрөөс эрдэс баялгийн салбарт баримтлах бодлогын баримт бичгийн анхны хэлэлцүүлгийг хийхээр байсан юм. Гэвч ажлын хэсгийнхэн  саналын томъёолол дээр дахин нухацтай хэлэлцэхээр болсон  байна . Иймээс дээрх асуудлыг хэлэлцэхийг хойшлуулснаар байнгын хорооны хуралдаан өндөрлөсөн юм.

6

Н.Энх